धनगढी- कैलालीको धनगढी उपमहानगरपालिका–१ पुरानो एअरपोर्ट नजिक रहेको शीतलपुर शिविरमा उपमहानगरपालिकाले आइतबार डोजर चलाएर नगर विकासको जग्गा अतिक्रमण गरी बनाइएका घरटहरा भत्कायो ।
अतिक्रमित जग्गा खाली गर्न उपमहानगरले त्यहाँ बनाइएका सबै संरचना भत्काएको छ । घर भत्किएपछि विचल्लीमा परिएको शिवरमा बस्दै आएकाहरु बताउँछन् । डोजरले घर भत्काउँदा आफूहरुको विचल्ली भएको त्यहाँ बस्दै आएका दानबहादुर गौतमले बताए । ‘एक्कासी आएर उपमहानगरले घर भत्कायो । सबै सामान पनि निकाल्न पाएनौँ । धेरै सामान तोडफोड भयो’, उनले भने ‘अब कहाँ गएर बस्ने हो । अन्त जाने कुनै ठाउँ नै छैन् । बालबच्चाको विचल्ली भएको छ ।’ उनी भन्छन् ‘डोजरले घर भत्कायो,कहाँ बस्ने टुङ्गो छैन् ।’
‘सात जनाको परिवार छ । खाने बस्ने टुंगो छैन । कहाँ बस्ने ? के खाने ? वर्षाको समय छ । पानी पनि पर्ने समय छ’, उनले भने ‘यस्तो बेलामा बालबच्चा लगेर कहाँ जाने । सामान सबै सडकमा छ ।’गौतमले भने ‘यो टोलमा बस्ने अरु नगर विकासको जग्गामा बसेका थिए । मेरो घर बनाएको जग्गा ऐलानी हो । मैले विगत २२ वर्षदेखि भोगचलन गर्दै आएको थिए । हामी सुकुम्बासी हौँ। ०६८ सालमा हामीलाई तत्कालिन सुकुम्बासी आयोगले परिचय पत्र पनि दिएको छ । अन्त कुनै ठाउँमा जग्गा छैन् ।’
‘उच्च अदालतले पनि वास्तविक सुकुम्बासी भए व्यवस्थापन गर्नु भनेको छ’,उनले भने ‘उपमहानगरले हाम्रो व्यवस्थापन नै नगरी एक्कासी घर भत्कायो । अव हामीले सरकार खोज्न कहाँ जाने ?’ ‘खाइनखाइ गरेर झण्डै २० लाख खर्च गरेर घर बनाएका थियौँ । घर भत्काइ दिए । साझ पनि कहाँ बस्ने टुंगो छैन्’ आँशु झार्दै गौतमले भने ‘सरकारले हाम्रो व्यवस्थापन गरेर पठाए हामीले जान्छौँ भनेकै थियो । गरिबले त बाच्न पनि नपाइने भयो ।’ गौतमले भने ‘शिविरमा रहेका १३ वटा घरटहरा भत्काइएका छन्’ उनले भने त्यसमध्ये १० परिवारले सुकुम्बासी परिचयपत्र नै पाएका छन् ।’
