धनगढी । सुदूरपश्चिम प्रदेश सरकारले टुक्राएका मन्त्रालय हटाएर साविककै मन्त्रालय कायम गरेको छ ।
प्रदेश प्रमुख नजिर मियाँले बिहिबार प्रदेश सरकारको निर्णय कार्यान्वयन गर्दै मन्त्रीहरुको जिम्मेवारी बाँडफाँड गर्दै साविककै मन्त्रालय कायम गरेका हुन् । मुख्यमन्त्री दीर्घबहादुर सोडारीले गरेको सिफारिसमा नेपालको संविधानको धारा १६८ को उपधारा ९ बमोजिम मन्त्रालय संख्या कायम गरेको प्रदेश प्रमुखको कार्यालयले जनाएको छ ।
साविककै मन्त्रालय कामय गर्दै आर्थिक मामिला मन्त्रालयको जिम्मेवारी जलस्रोत तथा शहरी विकास मन्त्री रहेका अक्कलबहादुर रावललाई दिइएको छ । शिक्षा, युवा तथा खेलकुद मन्त्री रहेकी लक्ष्मी विकलाई आन्तरिक मामिला तथा कानुन मन्त्रालय, भौतिक पुर्वाधार तथा यातायात मन्त्री रहेका कैलाश चौधरीलाई साविककै भौतिक पुर्वाधार विकास मन्त्रालय, कृषि तथा भूमिसुधार मन्त्री टीका थापालाई साविककै भूमि व्यवस्था कृषि तथा सहकारी मन्त्रालय, स्वास्थ्य महिला तथा बालबालिका मन्त्री ओमप्रकाश भाट सरललाई साविककै सामाजिक विकास मन्त्रालय र उद्योग वाणिज्य पर्यटन तथा संस्कृति मन्त्री माया पन्तलाई साविककै उद्योग पर्यटन वन तथा वातावरण मन्त्रालयको जिम्मेवारी दिइएको छ ।
प्रदेश मन्त्रिपरिषद्को निर्णयमा असार १६ गते मन्त्रालय टुक्राइएर तीन मन्त्रालय थप गरिएको थियो । नेकपा एमालले असार २० गते समर्थन फिर्ता लिदै एमालेबाट मन्त्री भएका तीन जना सरकार छोडेपछि प्रदेश सरकारले मन्त्रालय घटाउने तयारी गरेको थियो । प्रदेश सरकारको प्रवक्ता, आर्थिक मामिला रावलले विगतमा रहेको सात मन्त्रालय कायम हुने गरी मन्त्रिपरिषद्ल निर्णय गरी सिफारिस गरेकोमा बिहिबार प्रदेश प्रमुखले निर्णय कार्यान्वयन गरेको बताए ।
उनले नेकपा एमालेको दवावमा मन्त्रालय संख्या बढाइएको भएपनि एमालेले असार २० गते प्रदेश सरकारबाट बाहिरिएपछि १० वटा मन्त्रालय कायम राखिराख्न उपयुक्त नदेखिएकोले मन्त्रालय संख्या घटाइएको बताए ।