धनगढी- डिभिजन वन कार्यालय पहलमानपुरले डोजर लगाएर हटाएका भजनी नगरपालिका–१ स्थित चार वटा बस्तीलाई पुनःस्थापना गर्न माग गरिएको छ । बस्ती रक्षक संयुक्त संघर्ष समितिले हटाइएका चार बस्तीलाई पुनःस्थापना गर्न माग गरेको हो ।
बर्षातको समयमा नागरिकलाई अप्ठ्यारो पर्ने गरी वनले डोजर चलाई बस्ती हटाउनु गम्भीर षडयन्त्र भएको समितिले ठहर गरेको छ । बस्ती पुनःस्थापनाका लागि भजनीमा शुक्रवार संघर्ष समितिले एक कार्यक्रमको आयोजना समेत गरेको छ । सो कार्यक्रममा स्थानीय तहका प्रतिनिधि, सरोकारवाला र सबै राजनीतिक दलका नगर इन्चार्जको उपस्थिति रहेको र हटाइएका बस्तीलाई पुनःस्थापना गर्न आवश्यक पहल गर्ने निर्णय समेत भएको संघर्ष समितिका संयोजक वसन्त नेपालीले निशाना न्युजलाई जानकारी दिए ।
कार्यक्रममा नेपाल बसोवास बस्ती संरक्षण समाज नेपालका केन्द्रीय अध्यक्ष कुमार कार्की, भूमिअधिकार मञ्चका प्रदेश सचिव रामबहादुर चुनाराको उपस्थिति रहेको थियो ।
बस्ती पुनःस्थापनाका लागि भजनी नगरपालिकाका नगर प्रमुख केवल चौधरी सरोकारवाला निकाय र राजनीतिक दलका प्रतिनिधि सबैको हस्ताक्षर रहेको उनले बताए । जिल्ला प्रशासन कार्यालय कैलालीले पनि बस्ती पुनःस्थापनाका लागि पुनर्विचार गरिने जनाएको उनले बताए । जनताको हकहितका लागि सदैव तत्पर भएर लाग्ने नगरप्रमुख केवल चौधरीले आश्वासन दिएको उनले बताए । डिभिजन वन कार्यालयले गत असार १० गते उक्त बस्तीमा डोजर चलाएको थियो ।
सास्ती खेप्दै बस्तीका नागरिक
बस्ती हटाएपछि बसोवास गर्ने नागरिकले सास्ती खेप्दै आएका छन । बस्तीका घरटहरा वनले हटाएपछि बसोवास गर्ने नागरिकले सास्ती खेप्दै आएका हुन ।
वर्षातको समयमा उनीहरुको पालमूनिको बास रहेको स्थानीयले बताएका छन् । सर्पको डर उत्तिकै छ,पानी,लामखुट्टेका कारण बस्न असहज भइरहेको स्थानीय धनसरा विकले बताइन्।
चार बस्तीका ४३५ मानिस यहाँ बसोवास गर्दै आएको उनले बताइन । बस्तीका केही व्यक्तिमा झाडापखालको प्रकोप देखिएको,कसैलाई ज्वरो आउने,वान्ता हुने जस्ता लक्षण देखापरेको उनले बताइन् ।
