धनगढी । सुदूरपश्चिम प्रदेश सभाले प्रदेश सरकारलाई गत असार महिनामा भएको वर्षाका कारण पीडित प्रदेशवासीलाई तत्काल राहत र क्षतिपूर्ति उपलब्ध गराउन निर्देशन दिएको छ ।
प्रदेश सभाको बुधबार बसेको विशेष अधिवेशनको पाँचौं बैठकले गत असारमा भएको भिषण वर्षाका कारण प्रदेशबासीलाई क्षति पुग्न गएको भन्दै विपत् कोषबाट तत्काल राहत दिन निर्देशन गरेको हो ।
बैठकमा असार महिनाको वर्षाका कारण क्षति भएको विषयमा शुन्य समय व्यवस्था गरी छलफल गरिसकेपछि बैठकमा सभामुख भीम भण्डारीले ‘गत असार महिनाको अविरल वर्षाका कारण प्रदेशवासीलाई क्षति पुग्न गएकोले पीडित प्रदेशवासीलाई नियमानुसार तत्काल राहत तथा क्षतिपूर्ति उपलब्ध गराउन सभा मार्फत् प्रदेश सरकारलाई निर्देशन गरियोस्’ भन्ने प्रस्ताव प्रस्तुत गरेका थिए ।
उनको सो प्रस्ताव प्रदेश सभाले सर्वसम्मतिले स्वीकृत गरेको छ ।
सभामुख भण्डारीले स्वीकृत प्रस्ताव प्रदेश प्रमुख कार्यालयका पठाउन प्रदेश सभाका सचिवलाई निर्देशन दिएका छन् । उनले प्रदेश प्रमुखले आव्हान गरेको विशेष अधिवेशनको सम्बन्धित विषयको कारबाही समाप्त भएकोले अर्को सूचना नभएसम्मको लागि प्रदेश सभाको बैठक स्थगित भएको घोषणा गरेका छन् ।
