धनगढी- कैलाली जिल्ला अदालतले एक वर्षमा २ हजार ९ सय ११ मुद्धा फर्छ्यौट गरेको छ । अदालतले गत आर्थिक वर्ष २०८०/८१ मा उक्त संख्याका मुद्धा फर्छ्यौट गरेको हो ।
शुक्रबार पत्रकारसँग अन्तक्रिया कार्यक्रम गर्दै गत आवमा ४ हजार १ सय २९ मुद्धा रहेको अदालतले जनाएको छ । अघिल्लो आव २०७९/८० १ हजार ६ सय १२ मुद्धा जिम्मेवारी सरिआएका र २ हजार पाँच सय ८२ नयाँ मुद्धा दर्ता भएको अदालतका सूचना अधिकारी कमल घलेले जानकारी दिए ।
अुनमानित वार्षिक लगत ३ हजार ९ सय २२ रहेकोमा यथार्थ नयाँ मुद्धा दर्तामा बढी भएका कारण मुद्धा बढी भएको उनले बताए । गत आवमा यथार्थ मुद्धा फर्छ्यौट लक्ष्य २ हजार ६ सय ६१ रहेकोमा यथार्थ मुद्धा फर्छ्यौट १ सय ९ प्रतिशत भएको अदालतले जनाएको छ ।
गत आवबाट चालु आव २०८१/८२ मा १ हजार २ सय ८३ मुद्धा सरिआएको अदालतले जनाएको छ । पछिल्लो समय बैंकिङ कसुरका,सम्बन्ध विच्छेदका,जबरजस्ती करणी,लागूऔषधका मुद्धा बढी आउने गरेको अदालतका न्यायाधिस दण्डपाणि लामिछानेले बताए ।
उनले गरिबी,अशिक्षा,बेरोजगारीलगायतका कारणले समाजमा अपराधिक घटना बढ्दै गएको बताए । मान्छेका इच्छा चाहाना धेरै हुने,अर्काको देखासिकी गर्ने,ती आवश्यकता परिपुर्ति नभए सम्बन्ध विच्छेद गर्ने प्रवृति बढेको उनले बताए ।
त्यस्तै,सामाजिक सञ्जालको गलत प्रयोगले यस्ता सम्बन्ध विच्छेदको अवस्थासम्म आइपुग्ने गरेको उनले बताए । अदालतले आर्थिक अवस्था कमजोर भएकाहरुको कानूनी सहायतका लागि वैतनिक कानुन व्यवसायीको व्यवस्था गरेको समेत उनले बताए ।
