धनगढी- नेकपा (माओवादी केन्द्र)को सुदूरपश्चिम प्रदेश परामर्श बैठक बिहीबार सम्पन्न भएको छ । केन्द्रीय पदाधिकारीसहित प्रदेशमा कार्यरत केन्द्रीय सदस्य र प्रदेश पदाधिकारीको सहभागितामा बुधबारबाट धनगढीमा सुरु भएको बैठक सम्पन्न भएको हो ।
परामर्श बैठकमा सुदूरपश्चिम प्रदेशमा कार्यरत केन्द्रीय सदस्य र प्रदेश पदाधिकारी गरि ६३ जनाले सुझाव पेस गरेको माओवादी केन्द्रका सुदूरपश्चिम इन्चार्ज गिरिराजमणि पोखरेलले जानकारी दिए ।
उनले बैठकमा प्रदेशमा कार्यरत केन्द्रीय सदस्य र प्रदेश पदाधिकारीले आलोचनात्मक सुझाव,विचार र धारणा राखेको बताए । पार्टी भित्र फरक मत नभएको परामर्श बैठकमा स्पष्ट भएको बताउँदै इन्चार्ज पोखरेलले राष्ट्रिय सार्वभौमिकताको रक्षा,संविधान कार्यान्वयन, राजनीतिक उपलब्धिको जगेर्ना,समाजवाद तयारीका लागि पार्टी अध्यक्ष प्रचण्ड नेतृत्वमा जुझारु पार्टी निर्माण गर्ने नयाँ बाटोमा अघि बढ्ने कुरामा परामर्श बैठक एकमत भएको बताए ।
बैठकमा उठेका जिज्ञासा र प्रश्नको जवाफ पार्टी अध्यक्ष पुष्पकमल दाहाल ‘प्रचण्ड’ले दिएको उनले बताए । अध्यक्ष प्रचण्डले बैठकमा आएका सम्पूर्ण सुझाव केन्द्रीय समितिमा प्रस्तुत गर्ने प्रस्तावमा समाहित गर्ने धारणा राखेको उनले जानकारी दिए । त्यस्तै अध्यक्ष प्रचण्डले सुदूरपश्चिम पार्टीले तत्काल गर्नुपर्ने काम कर्तव्य र केन्द्रीय परिपत्र दृढतापूर्वक कार्यान्वयन गर्न निर्देशन दिएको उनले बताए ।
बैठकमा पार्टीका वरिष्ट उपाध्यक्ष नारायणकाजी श्रेष्ठ,उपाध्यक्षद्वय अग्निप्रसाद सापकोटा र पम्फा भुषाल, महासचिव देव गुरुङ,उपमहासचिव जनार्दन शर्मा,वर्षमान पुन,शक्ति बस्नेत र हरिबोल गजुरेलले प्रशिक्षणमुलक एवं निर्देशनात्मक मन्तव्य राखेको उनले जानकारी दिए ।
