धनगढी- गृहमन्त्री रमेश लेखकले प्रहरी संविधानले व्यवस्था गरेका नागरिकका हक अधिकार कार्यान्वयन गर्ने मुख्य संगठन भएको बताएका छन् ।
आज सुदूरपश्चिम प्रदेश प्रहरी गण धनगढी कैलालीका नवनिर्मित भवनहरुको उद्घाटन समारोहमा बोल्दै उनले यस्तो बताएका हुन् ।
उनले भने‘मुलुकमा कानूनी व्यवस्था कायम गर्न सरकारका सबै अंगले आ–आफ्नो महत्वपूर्ण भूमिका निर्वाह गर्छन् । तथापी नेपाल प्रहरी र सशस्त्र प्रहरी बलले संविधानमा व्यवस्था गरिएका नागरिकका हक अधिकारहरु कार्यान्वयन गर्ने कुरामा मूख्य अंग तथा मुख्य संगठनको रुपमा रहेका छन् ।’
उनले भने ‘संविधानले ग्यारेन्टी गरेका नागरिकका मौलिक हकहरु अधिकारको प्रचलनको बिषय होस्,अन्य कानूनको प्रचलनको सवाल होस्,मुलूकमा शान्ति सुरक्षा सुनिश्चित गर्ने सवाल होस् या अपराध नियन्त्रण गरेर अपराधीलाई सजायको बिषय होस, यसमा प्रहरीको भूमिका महत्वपूर्ण छ ।’
उनले संविधानमा व्यवस्था गरिएको नागरिकले सम्मानपूर्वक बाच्न पाउने हकको संरक्षण गर्ने नेपाल प्रहरी नै भएको बताए । उनले भने ‘कुनै पनि व्यक्तिको जीवनमा असम्मानजनक व्यवहार कसैले गर्नु हुन्न । यदी त्यो ग¥यो भने कानून विपरीत हुन्छ । त्यसको प्रचलन प्रहरीले गर्छ ।’
संविधानले व्यवस्था गरेका मौलिक हकको प्रचलन र कानूनी व्ष्यवस्था कायम गर्नमा प्रहरीकै सबैभन्दा बढी दायित्व,जिम्मेवारी र भूमिका हुने उनलको भनाइ छ । गृहमन्त्री लेखकले भौतिक स्रोतसधानले प्रहरी संगठनले थप क्रियाशिलताका साथ काम गर्न सक्ने बताए । उनले आज नै धनगढीमा रहेको नेपाल प्रहरी कल्याण कोष पेट्रोल पम्पको समेत उद्घाटन गरेका थिए ।
