धनगढी– कैलालीको धनगढी उपमहानगरपालिकाले खुटिया नदीमा जैविक तटबन्धन गर्न सुरु गरेको छ । खुटिया नदीमा बर्षेनी आउने बाढीबाट धनगढीलगायत क्षेत्रमा डुवान र कटानबाट प्रभावित हुने भएपछि उपमहानगरले जैविक तटबन्धको कामको सुरुवात गरेको हो ।
उपमहानगरले डुवान र कटानलाई मध्ये नजर गर्दै मंगलबारबाट वडा नम्बर ७, १२, १५ र १७ भएर बग्ने खुटिया नदीको किनारमा चाप जातको बाँस, अम्रिसो, नेपियर बोट लगाएर जैविक तटबन्धन गर्न थालेको धनगढी उपमहानगरपालिका नगरप्रमुख गोपाल हमालले बताए ।
चालु आर्थिक वर्षमा उपमहानगरपालिकाले नदीको किनार ३० किलोमिटर क्षेत्रमा ६ हजार बाँस, ६ हजार ६ सय अम्रिसो र ६ हजार ६ सय नेपियरका बिरुवा रोपेर जैविक तटबन्धन गरिने नगरप्रमुख हमालले जानकारी दिए ।
जैविक तटबन्धनबाट भूक्षय रोकिनुका साथै पर्यावरणमा स्वच्छता आउने धनगढी उपमहानगरपालिकाले जनाएको छ । उपमहानगरपालिकाका अनुसार बाँसका बोट बढेपछि स्थानीय समुदायलाई बाँसबाट उत्पादन हुने वस्तु निर्माणको सीप दिएर बजारीकरण गरिने छ । त्यसबाट स्थानीयबासीको आर्यआर्जनमा वृद्धि भइ ग्रामीण क्षेत्रको अर्थतन्त्रमा टेवा पुग्ने छ ।
उपमहानगरका वातावरण इन्जिनियर अशोक अवस्थीले सो तटबन्धन धनगढी उपमहानगरपालिका र जीआईजेडको ग्रेप परियोजनाको सँयुक्त साझेदारीमा १७ लाखको लागतमा गर्न लागेको बताए ।
स्थानीयले जैविक तटबन्धन भएपछि वातावरण स्वच्छता हुनुका साथै कटानबाट जोगिन सहयोग पुग्ने स्थानीयले बताएका छन् । खुटिया नदीमा आउने बाढीले बर्षेनी ठूलो धनजनको क्षति हुने गरेको छ ।
