धनगढी- लुम्बिनी प्रदेशसभा सदस्य रेखाकुमारी शर्माले बालिकालाई घरेलु कामदारमा लगाएको प्रति विभिन्न संघसंस्थाले ध्यानाकर्षण भएको जनाएका छन् । आज एक विज्ञप्ती जारी गर्दै अधिकारका क्षेत्रमा काम गर्ने विभिन्न सात संघसंस्थाले ध्यानाकर्षण भएको जनाएका हुन् ।
मुक्त कमैया महिला विकास मञ्च,मुक्त कमैया समाज,मुक्त कम्लहरी विकास मञ्च, कैलाली,थारु कल्याणकारी सभा,थारु विद्यार्थी समाज,कमैया प्रथा उन्मुलन समाज र थरुहट थारुवान राष्ट्रिय मोर्चाले संयुक्त विज्ञप्ति जारी गर्दै ध्यानाकर्षण भएको जनाएका छन् ।
‘विगत ८ वर्षदेखी १४ वर्षकी उर्मिला चौधरीलाई घरेलु मजदूरकारुपमा कम्लहरी बनाई बालबालिकाको संविधानप्रदत्त अधिकारहरुको हनन् गरी विभिन्न प्रकारका शारिरीक तथा मानसिक यातना दिएको समाचारहरु प्रकाशित भएको समाचारबाट हामी अधिकारको क्षेत्रमा काम गर्ने संघसंस्थाहरुको गम्भीर ध्यानाकर्षण भएको छ’ विज्ञप्तिमा भनिएको छ ‘कमलहरीको रुपमा काम गरिरहेकी बालिकालाई काठमाडौँ महानगरपालिकाले उद्धार गरी निजको संरक्षणको जिम्मेवारी लिने कार्यको प्रशंसा गर्न चाहन्छौँ ।’
लामो समयको आन्दोलन र संघर्षपश्चात नेपाल सरकारले विसं. २०७० असार १३ गते नेपालमा बाल श्रमिककारुपमा रहेका कमलहरीहरुलाई दासताको बन्धनबाट मुक्तिको घोषणा गरेको उल्लेख गर्दै अझै पूर्णरुपमा कमलहरी प्रथाको अन्त्य हुन नसकेको विज्ञप्तिमा भनिएको छ ।
‘देशका विभिन्न शहरहरुमा उच्च पदस्त व्यक्तिहरु तथा व्यापारीहरुले लुकीछिपी थारुलगायत अन्य बालबालिका तथा महिलाहरुलाई बंधुवा मजदूरकारुपमा राखिरहेका छन कि भन्ने प्रमाणको रुपमा बालिका उर्मिला चौधरीको घटनाबाट समेत सहजै अनुमान लगाउन सकिन्छ’ विज्ञप्तिमा उल्लेख छ ।
‘लुम्बिनी प्रदेशसभा सदस्य जस्तो गरिमामय पदमा आसिन माननीय रेखाकुमारी शर्मा ज्यूले उर्मिला चौधरीलाई कम्लहरी राखी गरेको मानसिक तथा शारीरिक श्रम शोषणको नेपाल सरकारले निश्पक्ष रुपमा छानबिन गर्न माग गर्दछौँ’ विज्ञप्तिमा भनिएको छ, ‘शर्मा सम्बद्ध दलले समेत छानविन गरि आवश्यक कार्वाही गर्न र निज पीडित उर्मिला चौधरीलाई न्याय सहित उचित पुनःस्थापनाका लागि नेपाल सरकारसँग जोडदार माग गर्दछौँ ।’
