धनगढी- उपप्रधान एवं सहरी विकास मन्त्री प्रकाशमान सिंहले जनतामा भएको नैरास्यता रोक्न दुई ठूला दल मिलेर सरकार बनाएको बताएका छन् । धनगढी उपमहानगरपापलिको १०औँ स्थापना दिवसको अवसरमा आज आयोजित कार्यकममा बोल्दै उनले यस्तो बताएका हुन् ।
उनले भने ‘८/९ महिनामा सरकार परिवर्तन हुँदा कामले गति लिन सकेन । सरकार नै टिक्दैन, के काम हुन्छ भनेर जनतामा नैरास्यता थियो । त्यसलाई रोक्न यो सरकार बनेको हो ।’
उनले भने‘स्थिर सरकार नहुँदा जनअपेक्षा अनुसार काम हुन सकेन । स्थिरता र कामलाई गति दिन दुई यो सरकार बनेको हो ।’
अर्थतन्त्रमा आएको मन्द गतिलाई लयमा फर्काउन सरकार लागिरहेको उपप्रधानमन्त्री सिंहले दावी गरे । उनले संविधान जारी भइसकेपछि कार्यान्वयनमा आएका अप्ठ्यारालाई सहज गर्न आवश्यक ठाउँमा संशोधन गर्न कांग्रेस र एमाले बीच भएको सहमतिमा उल्लेख भएको उनले बताए ।
उपप्रधानमन्त्री सिंहले सबै राजनीतिक दल मिलेर संविधान निर्माण भएको बताउँदै संविधानमा भएका जनताका अधिकार खोसिन लागेको भन्ने कुरा गलत भएको बताए ।
कार्यक्रममा बोल्दै धनगढी उपमहानगरपालिकाका नगरप्रमुख गोपाल हमालले जनताको कल्याणकारी नगर बनाउन प्रयासरत बताएका छन् । उनले बुहआयामिक विकासका लागि उपमहानगरको स्रोत साधनले नपुग्ने बताउँदै त्यसका लागि प्रदेश तथा संघ सरकारको सहयोग आवश्यक हुने बताए ।
जनतालाई विश्वास दिलाउने पहिलो खुड्किलो स्थानीय तह भएको उनले बताए । कार्यक्रममा शैक्षिक सत्र २०८० मा कक्षा ८,१० र १२ मा उत्कृष्ट अंक ल्याउने संस्थागत तथा सामुदायिक विद्यालयका छात्र/छात्रा, धनगढीस्थित छ लेन सडकमा तारजालीसहित वृक्षारोपणमा सहयोग गर्ने संघसंस्था,उत्कृष्ट विद्यालय ,शिक्षक,कर्मचारीलगायतलाई नगद सहित सम्मान गरिएको थियो ।
