काठमाडौं । तनहुँ, ब्यास नगरपालिका-१ गलफुबेसीस्थित सडकमा गल्फुबेसीबाट छाब्दीतर्फ जाँदै गरेको ग.१ त ७०३१ नम्बरको ट्याक्टरको ठक्करबाट पैदलयात्री सोही ठाउँ बस्ने ८ वर्षीय सविन कुमालको सोमबार बिहान मृत्यु भएको छ । ठक्करबाट गम्भीर घाइते भएका उनको रत्नहरी अस्पताल दमौलीमा उपचारको क्रममा मृत्यु भएको हो । ट्याक्टर चालकलाई प्रहरीले नियन्त्रणमा लिएको छ ।
चितवन, रत्ननगर नगरपालिका-९ टिकौली जंगलस्थित सडकमा ना.४३ प ६२४१ नम्बरको मोटरसाइकल, बा.प्र.०३-००३ प ८६६ नम्बरको स्कुटर र ग.१२ प ७१७२ नम्बरको मोटरसाइकल एकआपसमा ठक्कर खाई सोमबार बिहान दुर्घटना हुँदा स्कुटर चालक स्याङजा आदिखोला गाउँपालिका-३ बस्ने २३ वर्षीय रोहन पौडेलको मृत्यु भएको छ । दुर्घटनामा गम्भीर घाइते भएका उनको भरतपुर सरकारी अस्पतालमा उपचारको क्रममा मृत्यु भएको हो ।
साथै दुर्घटनामा घाइते भएका ३ वटै सवारी साधनमा सवार मध्ये ४ जनाको नयाँ मेडिकल कलेजमा र १ जनाको बकुलर अस्पताल टांडीमा उपचार भइरहेको छ ।
मोरङ, रंगेली नगरपालिका-१ पोखरी टोलस्थित सडकमा प्र.१-०४-००१ त १००४ नम्बरको ट्याक्टरले को ६ प ६५४६ नम्बरको मोटरसाइकललाई सोमबार दिउँसो ठक्कर दिँदा मोटरसाइकल चालक धनपालथान गाउँपालिका-१ बस्ने ४६ वर्षीय राम बहादुर माझी थारूको मृत्यु भएको छ ।
दुर्घटनामा गम्भीर घाइते भएका उनको गोल्डेन अस्पताल विराटनगरमा उपचारको क्रममा मृत्यु भएको हो । ट्याक्टरले मोटरसाइकललाई ठक्कर दिँदा मोटरसाइकल अनियन्त्रित भई पैदलयात्रीलाई समेत ठक्कर दिई दुर्घटना भएको थियो ।
साथै दुर्घटनामा घाइते भएकी मोटरसाइकलमा सवार १ जना र पैदलयात्रीको सोही अस्पतालमा उपचार भइरहेको छ । ट्याक्टर चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
