धनगढी- जिल्ला समन्वय समिति कैलालीको प्रमुखमा नागरिक उन्मुक्ति पार्टीकी रुपमति डगौंराथारुले उम्मेदवारी दर्ता गराएकी छन् । डगौराको प्रस्तावकमा जोशीपुर गाउँपालिका उपाध्यक्ष रेखादेवी कठरिया र समर्थकमा भजनी नगरपालिका उपप्रमुख राजु तिरुवा रहेका छन् । प्रस्तावक कठरिया र समर्थक तिरुवा दुवैजना नागरिक उन्मुक्ति पार्टीबाट निर्वाचित जनप्रतिनिधि हुन् ।
समन्वय समिति प्रमुखमा उम्मेदवारी दर्ता गराएकी डगौरा टीकापुर नगरपालिका वडा नम्बर ४ बाट निर्वाचित कार्यपालिका सदस्य हुन् ।
समन्वय समितिको प्रमुखमा नेपाली काँग्रेसले टीकाकुमारी चौधरी भुललाई उम्मेदवार बनाउने निर्णय गरेको छ । नेकपा एमालेको समर्थनमा काँग्रेस उम्मेदवारले केहीबेरमा उम्मेदवारी दर्ता गराउने तयारी छ । काँग्रेस र एमालेबीच काँग्रेस उम्मेदवारलाई सघाउने सहमति भएको छ । नागरिक उन्मुक्ति पार्टी पनि केन्द्र र प्रदेशमा सत्ता गठबन्धनमै छ ।
समन्वय समितिको प्रमुखमा निर्वाचित हुनका लागि काँग्रेस–एमालेको बहुमत पुग्छ ।
कैलालीमा १३ वटा पालिकाका प्रमुख र उपप्रमुख गरी २५ मतदाता छन् । टीकापुर नगरपालकिाका उपप्रमुख भने भ्रष्टाचारमा मुद्दा दर्ता भएका कारण निलम्बित अवस्थामा रहेकाले मतदान गर्न पाउने छैनन् । यहाँ काँग्रेसका ८, नागरिक उन्मुक्तिको सात, एमालेको पाँच, माओवादीको तीन, एकीकृत समाजवादीको एक मत छ । स्वतन्त्रबाट निर्वाचित एक मत छ ।
