धनगढी । स्वर्गीय लोकेन्द्रबहादुर शाह र स्वर्गीय मोहनबहादुर शाहको स्मृतिमा स्थापना भएको लोकेन्द्र–मोहन युवा वर्ष सम्मान २०२४ द्वारा धनगढीका युवा गायक प्रेमविवश चन्द सम्मानित भएका छन् ।
धनगढी जेसिजको ४२औं पदस्थापना तथा पुरस्कार वितरण समारोहमा गायक एवं सञ्चारकर्मी चन्दलाई डेउडा र लोक दोहोरी गीत गायनसंगै संरक्षण ,सम्बर्द्धनमा टेवा पुर्याउनुका साथै युवाहरूलाई सामाजिक क्रियाकलापमा उत्साहित गर्न महत्त्वपूर्ण भुमिका निर्वाह गरेको भन्दै सम्मान गरिएको हो ।
धनगढी जेसिज बर्ष २०२४ का अध्यक्ष अरुण सिंहको अध्यक्षतामा भएको धनगढी जेसिजको ४२औं पदस्थापना तथा पुरस्कार वितरण समारोहमा प्रमुख अतिथि नेपाली कांग्रेसका नेता एवं सुदूरपश्चिमका पूर्वमन्त्री प्रकाशबहादुर देउवा रहेका थिए ।
विसं. २०५२ सालमा आफ्ना हजुरबुवा र बुवाको सम्झनामा स्थापना भएको लोकेन्द्र–मोहन स्मृति प्रतिष्ठानबाट बिगत १२ बर्ष देखि निरन्तर हरेक बर्ष १ जना युवा प्रतिभालाई सम्मान गर्ने गरिएको नेपाली कांग्रेसका सुदूरपश्चिम प्रदेश समितिका महामन्त्री एवं लोकेन्द्र–मोहन स्मृती प्रतिष्ठानका अध्यक्ष नरनारायण शाह ‘मनु’ले बताए ।
लोकेन्द्र–मोहन स्मृति प्रतिष्ठानद्वारा समाजमा रचनात्मक सामाजिक क्रियाकलाप गर्न उत्साहित गर्ने १ जना युवालाई हरेक बर्ष सम्मान गर्ने गरिएको लोकेन्द्र–मोहन युवा सम्मान विशेष गरि धनगढी जेसिजको पदस्थापन तथा पुरस्कार वितरण कार्यक्रममा प्रदान गर्दै आएको छ ।
बैतडी जिल्लाको शिवनाथ गाउँपालिका–४ बैतडीमा बुवा बली चन्द र आमा जनमती चन्दको साहिला सन्तानको रूपमा विसं. २०५५ साल वैशाख २४ गते जन्मिएका गायक एवं सञ्चारकर्मी चन्द डेउडा प्रतिष्ठान केन्द्रीय कार्यसमिति कोषाध्यक्ष ,राष्ट्रिय लोक तथा दोहोरी गीत प्रतिष्ठान नेपाल सुदूरपश्चिम प्रदेश कार्य समिति प्रवक्ता,हाम्रो संस्कृति हाम्रो पहिचान नेपाल,लाइन्स क्लवलगायतका विभिन्न सामाजिक संघसंस्थामा आवद्ध रहेका छन् ।
