कैलाली- सुदूरपश्चिम प्रदेशका मुख्यमन्त्री त्रिलोचन भट्टले शहर बजारका होटल तथा रेष्टुराँमा बसेर लोकतान्त्रिक संघीय ब्यवस्थाको बिरोध गर्नुको अर्थ नरहेको बताएका छन् ।बिहीबार धनगढीमा आयोजित मुख्यमन्त्रीसँग सिधाकुरा कार्यक्रममा उनले सो कुरा बताएका हुन् । जनताको लामो संघर्ष र बलिदानीबाट आएको यो ब्यवस्थाको मुल्याङ्कन गर्नेबेला अहिले नै आइनसकेको भन्दै मुख्यमन्त्री भट्टले संविधानअनुसार यो नयाँ व्यबस्थामा जनआकांक्षा बढी भएकाले देशको कर्मचारी संयन्त्र तथा प्रशासनिक प्रणली पनि त्यहीअनुसारको चुस्त दुरुस्त हुनुपर्ने आफ्नो अनुभव रहेको बताए ।
इच्छा आकांक्षा र सोच नयाँ तर काम गर्ने प्रणाली पुरानै भएकाले धेरैजसो काम सम्पन्न गर्न नसकिएको प्रष्टिकरण छ ।‘‘हिजोको एकात्मक राज्य व्यबस्थाले पछाडि पारिएको सुदूरपश्चिमको अभाव र बिकट्तालाई प्रदेश सरकारको पाँच बर्षे कार्यकालमै कायापलट हुने सम्भवना थिएन’ मुख्यमन्त्री भट्टले भने, ‘संविधानतः ऐन कानूनको निर्माण, कार्यालय र कर्मचारीको व्यवस्थापन गरेर प्रदेश सरकार सर्वसधारण जनताको घर आँगनमा पुगेको बेला शहर बजारका होटल तथा रेष्टुराँमा बसेर लोकतान्त्रिक संघीय ब्यवस्थाको बिरोध गर्नुको तुक छैन् ।’
करिब सात दशकदेखि लोकतान्त्रिक गणतन्त्रको अभ्यासमा रहेको भारतका प्रान्त सरकारसँग हाम्रो प्रदेश सरकारलाई नदाँज्न आग्रह गर्दै मुख्यमन्त्री भट्टले आफ्नै साधन स्रोतलाई परिचालन गरेर प्रदेशमा कृषि, पर्यटन, जलविधुत, शिक्षा स्वास्थ्य लगायतका क्षेत्रको पूर्वाधार निर्माणमा सरकार लागिपरेको बताए ।
सुदूरपश्चिम विश्विविधालयका पूर्व रजिस्टार डा। हेमराज पन्तले संघीय व्यबस्थामा भ्रष्टाचार बढेको र जनताले अपनत्व महसुस गर्न नसकेको बताए। अबको केही बर्षमै जनता व्यबस्थाको बिरुद्धमा सडकमा उत्रन सक्ने उनले चेतावनी दिए। पूर्व मन्त्रीसमेत रहनुभएका एमाले नेता पठानसिंह बोहराले एमाले सरकारमा रहँदा ल्याएका कार्यक्रम गठबन्धन सरकारले छाडे्को गुनासो गरे ।
