कैलाली । सुदूरपश्चिम प्रदेश सभाको पूर्व सन्ध्यामा मुख्यमन्त्री कमलबहादुर शाहले सर्वदलिय बैठकको आह्वान गरेका छन् ।
शनिबार मुख्यमन्त्री तथा मन्त्रीपरिषदको कार्यालय धनगढीमा बसेको सर्वदलिय बैठकमा प्रमुख विपक्षी दलका र सत्तारुढदलका नेताहरुको सहभागिता रहेको थियो ।
बैठकमा संसद नियमित रुपमा सुचारु गर्ने, आगामी अधिवेशनबाट नीति तथा कार्यक्रम र बजेट ल्याउने विषयमा छलफल भएको थियो । मुख्यमन्त्री शाहले बैठकमा सहभागी दलका नेताहरुसँग संसदलाई प्रभावकारी बनाउने, नागरिकका समस्या समाधान गर्ने गरी परिणाममूखी नतिजा दिन सरकार प्रतिवद्ध रहेकोले रचनात्मक सुझाव दिन आग्रह गरेका थिए ।
उनले चालु आर्थिक वर्षमा भएका समस्यालाई सुधार गर्दै विकास खर्चलाई प्रभावकारी रुपमा सञ्चालन गर्न सरकार लागि परेको बताए ।
बैठकमा उपस्थित प्रमुख विपक्षी दलका र सत्तारुढ दलका नेताहरुले सरकारलाई सुझाव दिएका थिए ।
मन्त्रिपरिषद्को सिफारिसमा प्रदेश प्रमुखले जेठ ११ गतेबाट सुदूरपश्चिम प्रदेश सभाको अधिवेशन आह्वान गरेका छन् ।
