धनगढी । सुदूरपश्चिम प्रदेशका मुख्यमन्त्री कमलबहादुर शाहले चाडपर्व लक्षित विशेष सुरक्षा योजना लागूगर्न प्रदेशस्थित सुरक्षा निकायका प्रमुखहरुलाई निर्देशन दिएका छन् ।

शुक्रबार आन्तरिक मामिला तथा कानुनमन्त्री हीरा सार्कीको अध्यक्षतामा बसेको प्रदेश सुरक्षा समितिको बैठकमा मुख्यमन्त्री शाहले सुरक्षा निकायका प्रमुखलाई यस्तो निर्देशन दिएका हुन् ।

उनले दसैँ, तिहार र छठ जस्ता चाडपर्वको समयमा आपराधिक क्रियाकलाप बढ्नसक्ने भएकोले शान्ति सुरक्षा तयारीमा लाग्न निर्देशन दिए ।

उनले समाजमा हुनसक्ने अवाञ्छित तथा आपराधिक गतिविधिहरु नियन्त्रण र सडक दुर्घटना न्यूनिकरण गरी आम नागरिकलाई सुरक्षाको प्रत्याभूति दिलाउनु सरकारको दायित्व भएकोले त्यसतर्फ सहज रहन सुरक्षा निकायलाई निर्देशन दिए ।

प्रदेश सुरक्षा समितिको बैठकमा पछिल्लो समय देशभरी सञ्चालन भएका विभिन्न घटनाहरुले सुदूरपश्चिम प्रदेशको शान्ति सुरक्षामा पारेको प्रभाव र बिद्यमान अवस्थाका बारेमा छलफल भएको थियो ।