धनगढी । नेपाली कांग्रेस कैलाली जिल्ला कार्यसमितिले जेनजी आन्दोलनका क्रममा भएको तोडफोड र आगजनीमा संलग्नलाई कारबाही गर्न सरकारसँग माग गर्ने निर्णय गरेको छ ।
बिहीबार बसेको जिल्ला कार्यसमितिको बैठकले जेनजी आन्दोलनका क्रममा भएको आगजनी, तोडफोड र लुटपाटको घटनाप्रति दुख ब्यक्त गर्दै सो कार्यमा संलग्नको पहिचान गरि कडा भन्दा कडा कारबाही गर्न र क्षतिपूर्ति उपलव्ध गराउन सरकार संग माग गर्ने निर्णय गरेको हो ।
बैठकका निर्णय सार्वजनिक गर्दै नेपाली कांग्रेस कैलालीका सचिव नृप सुनारले भाद्र २३ गते काठमाडौंमा भएको प्रदर्शनीका क्रममा सहिद भएका धनगढी उपमहानगरपालिका–५ तारानगरका गौरव जोशीको परिवारलाई रु. १० हजार आर्थिक सहयोग गर्ने निर्णय भएको बताए ।
त्यस्तै,विभिन्न सरकारी निकाय, निजि, व्यवसायिक प्रतिष्ठानमा प्रदर्शनका क्रममा भएको क्षतिको सरकारले वास्तविक आंकलन गरि आवश्यक पुर्नस्थापना र पुर्ननिर्माणको कार्य अगाडि समेत माग गर्ने निर्णय भएको उनले बताए ।
पार्टीका नेताहरुको निजी आवास, पार्टी कार्यालायहरुमा भएको आगजनी, लुटपाट तथा तोडफोडले लोकतन्त्र मास्ने र कांग्रेसलाई कमजोर बनाउने विभिन्न शक्ति केन्द्रहरुको पर्दा पछाडिको खेल र प्रदर्शनमा दुषित स्वार्थपूर्ति गर्ने मनसायका व्यक्ति र समूहको घुसपैठ हो भन्ने ठहर बैठकले गरेको उनले बताए ।
बैठकले अहिलेको विषम परिस्थिमा पार्टीका सभापति शेरबहादुर देउवा उपचारका क्रममा रहेकाले वर्तमान पदाधिकारीहरूले सुझबुझका साथ पार्टीमा एकता कायम गरी निर्णय लिन आग्रह गर्ने निर्णय गरिएको उनले बताए ।
नेपाली कांग्रेस कैलालीका सभापति नारायणदत्त भट्टले जनभावनाको महत्वकांक्षालाई चरमचुलीमा पु¥याएर सेवा दिने कुरामा कमिकमजोरी रहेको बताउँदै त्यसलाई पार्टीले सच्याउनु पर्ने तथा सुध्रिनु पर्ने बताए ।
उनले भने ‘पार्टी जुन अवस्थामा छ । राष्ट्र जुन अवस्थामा छ । यस्तो बेलामा जिम्मेवारीमा बसेका साथीहरुले सबै दोषी छन् । जसरी टाउकोलाई मात्रै दोष देखाउने कुरा उठिराखेको छ । त्यो राम्रो होइन् । सबै जिम्मेवार छन् ।’ अहिलेको बिषम परिस्थितिमा पार्टी एकजुट भएर अगाडि बढ्नुपर्ने उनले बताए ।
