कैलाली । धनगढी उपमहानगरपालिका क्षेत्र भित्रका सडकहरुको सरसफाई गरिन थालेको छ । धनगढी उपमहानगरपालिकाको सरसफाई अभियान अन्र्तगत टोलिले दैनिक रुपमा सरसफाई गर्ने गरेको उपमहानगरपालिकाले जनाएको छ ।
सडकमा जथाभावि फोहर नफाल्न र फोहोर डस्टविनमा राख्न नगरपालिकाले अनुरोध गर्दै आएको पनि छ ।
सफा धनगढी अभियान अन्तर्गत उपमहानगरपालिकाले धनगढी प्रवेश गर्ने हरेक यात्रुवाहक बसमा सवार यात्रुलाई धनगढीमा फोहोर नफाल्न सचेत गराउने काम जारी छ । धनगढीमा यसअघि जथाभाबी फोहोर फाल्ने विभिन्न व्यक्ति एवं संघसंस्थालाई उपमहानगरपालिकाले जरिमाना समेत गराइसकेको छ । धनगढीको कुनै पनि स्थानमा फोहोर फाल्न निधेष गरिएको सामुदायिक शाखा प्रमुख टंक विष्टको भनाई रहेको छ ।
सार्वजनिक स्थानहरुमा राखिएका डस्टबिनहरुमा मात्र फोहोर फाल्न उपमहानगरपालिकाले सबैमा आग्रह गर्दै आएको छ । कुहिने र नकुहिने फोहोरका लागि छुट्टाछुट्टै डस्टबिन समेत राखिएको छ ।
धनगढीलाई सफा सहरको रुपमा विकास गर्न जथाभाबी फोहोर फाल्ने बानीमा सुधार ल्याउन उपमहानगरले विभिन्न सचेतनामुलक कार्यक्रमको समेत आयोजना गर्दै आएको छ ।
उपमहानगरभित्रका १९ वटै वडाभित्र हरेक टोल तथा गाउँमा फोहोरको उचित व्यवस्थापनका लागि महिला समुह नै बनाएर टोल तथा गाउँघर सफा गर्ने काम हुँदै आएको छ । उपमहानगरपालिकाले धनगढीमा प्लाष्टिक बिक्री र प्रयोगमा समेत यसअघि नै प्रतिबन्ध लगाइसकेको छ ।
