धनगढी । लोकतान्त्रिक गतिशील पार्टी नेपालका अध्यक्ष डा दिनेश प्रसाईँले पार्टीले २० प्रतिशतभन्दा कम मत पाए सरकारमा सहभागी नहुने स्पष्ट नीति लिएको बताएका छन् ।
सो पार्टीले शनिबार धनगढीमा आयोजना गरेको पत्रकार सम्मेलनमा बोल्दै उनले आफ्नो पार्टी जनमतको बलमा मात्रै सरकारमा जाने बताएका हुन् ।
उनले भने ‘जनताको विश्वास बिना सरकारमा जानु नैतिकता विपरीत हो । हामी जनमतको बलमा मात्रै सरकारमा जानेछौँ । हाम्रो पार्टीका एजेन्डा जनताले मन पराइरहेका र पार्टी क्रमशः जनताको रोजाइमा पर्न थालेको छ ।’
उनले आफ्नो पार्टीले विचार मिल्ने दलहरूसँग सहकार्यको ढोका खुला राखेको समेत बताए । त्यस्तै, उनले पार्टीले सदस्यताको अधिकतम १६ वर्षसम्म मात्र रहने व्यवस्था गरेको बताउँदै १६ वर्ष पूरा भएपछि सदस्यता स्वतः अन्त्य हुने र नवीकरण नहुने प्रावधान पार्टीले आफ्नो विधानमै समावेश गरेको बताए ।
उनले भने ‘पार्टी विधानको यो व्यवस्थाले पार्टीमा निरन्तर नवीकरण र नयाँ नेतृत्वको अवसर सुनिश्चित हुनेछ । पुरानोलाई मात्र होइन, नयाँ पुस्तालाई पनि समान अवसर दिने पक्षमा छौँ ।’
त्यस्तै, उनले पार्टीका पदाधिकारीहरूले कुनै पनि तहको निर्वाचनमा प्रत्यक्ष उम्मेदवारका रूपमा भाग लिन नपाउने नियम पनि लागू गरिएको बताए ।
अध्यक्ष प्रसाईँले गतिशील पार्टीले वर्तमान संविधान र व्यवस्थाभित्र रहँदै सुशासन, रोजगार र पारदर्शी शासनका एजेन्डा अघि सारेको बताए । पार्टीमा एक अध्यक्ष ५ महासचिव, एक कोशाध्यक्ष सहित २९ सदस्य रहने जनाइएको छ ।
