धनगढी । सुदूरपश्चिम प्रदेशका मुख्यमन्त्री कमलबहादुर शाहले किसानहरुले धानको समर्थन मूल्य पाए/नपाएको विषयमा अनुगमन गर्न निर्देशन दिएका छन ।
उनले आज कैलालीका प्रमुख जिल्ला अधिकारीलाई यस्तो निर्देशन दिएका हुन ।
किसानहरुबाट नेपाल सरकारले निर्धारण गरेको धानको समर्थन मूल्य नपाएको गुनासो आएपछि मुख्यमन्त्री शाहले मंगलबार प्रमुख जिल्ला अधिकारी कृष्णप्रसाद लम्साललाई टेलिफोन सम्पर्क गरी अनुगमन गर्न निर्देशन दिएको मुख्यमन्त्रीको सचिवालयले जनाएक्क छ ।
उनले सरकारले तोकेको समर्थन मूल्य व्यापारीहरुले कार्यान्वयन नगरेको पाएइमा कारवाहीको दायरामा ल्याउन निर्देशनसमेत दिएको जनाइएको छ ।
सरकारले मोटा धानको मूल्य प्रति क्विन्टल तीन हजार ४६३.८१ रुपियाँ र मध्यम धानको मूल्य प्रति क्विन्टल तीन हजार ६२८.३३ रुपियाँ निर्धारण गरेको छ ।
यसअघि जिल्ला प्रशासन कार्यालय कैलालीले सूचना जारी गर्दै सरकारले निर्धारण गरेको धानको समर्थन मूल्य कार्यान्वयन गराउन सबै पालिकालाई आग्रह गरेको थियो ।
