धनगढी । यातायात व्यवस्था कार्यालय धनगढी न्युनतम सेवाहरु सञ्चालन गरिरहेको छ । जेनजी आन्दोलनका क्रममा गत भदौ २४ गते भएको तोडफोड तथा आगजनी पछि विभिन्न समस्याका बावजुद गत असोज २ गतेबाट सेवा सुरु गरेको हो ।
हाल कार्यालयले सवारी दर्ता,सवारी कर तिर्ने,नवीकरण गर्ने,जाँचपास गर्ने,रुट व्यवस्थापन गर्ने,कार्यालयमा बाँकी रहेका सवारी चालक अनुमति पत्र वितरण लगायतका काम भइरहेको कार्यालय प्रमुख भुवन जोशीले जानकारी दिए ।
उनले लाइसेन्स बाहेका सेवाहरु सञ्चालन भइरहेको बताए । उनले भने ‘अहिले देशभरी नै लाईसेन्स सेवा बन्द छ । विभागले एक दुई दिनभित्रै लाइसेन्सको सिस्टम बन्छ भनेको छ । त्यो हुने वित्तिकै सेवा स्ुरु हुन्छ ।’
तोडफोड तथा आगजनीबाट कार्यालयमा ठूलो क्षति पुगेको छ । कार्यालय भवनको भौतिक क्षति बाहेक करिब डेढ करोड बढीको क्षति भएको कार्यालय प्रमुख जोशीले बताए । उनले भने ‘३÷४ वटा कार्यालय भवनमा क्षति पुगेको छ । ढड्डा जलेका छन् । मौजुदा कानुनमा टेकेर ढड्डा बनाउने काम भइरहेको छ । लाइसेन्स फाँटमा सबैभन्दा बढी क्षति भएको छ ।’
उनले भने ‘प्राविधिक फाँट जलेको छ,यसको निर्माणका लागि मन्त्रालयसँग छलफल गरिररहेका छौँ । परिक्षा गर्ने भवन जलेको छ,परीक्षाका लागि बैकल्पीक उपाय अपनाउन तिर लागेका छौँ ।’
जेनजी प्रदर्शनको क्रममा भएको तोडफोड र आगजनीका कारण यहाँका धेरैजसो सरकारी कार्यालयहरुमा ठूलो क्षति पुगेको छ ।
