कैलाली । स्वास्थ्य कार्यालय कैलालीले वार्षिक समीक्षाको तयारीलाई तीब्रता दिएको छ । बर्षभरी भएका क्रियाकलापको वार्षिक रुपमा समीक्षा,आगामी वर्षमा गरिने क्रियाकलापहरुको योजना निर्माण लगायतका बिषयमा गहन छलफल गर्दै स्वास्थ्य कार्यालय कैलालीले वार्षिक समीक्षाको तयारीलाई तीब्रता दिन थालेको हो ।
कैलालीका १३ वटा स्थानीय तहहरु मध्ये मोहन्याल गाउँपालिका, चुरे गाउँपालिका,बर्दगोरिया गाउँपालिका,टीकापुर नगरपालिका,जोशीपुर गाउँपालिका,गौरीगंगा नगरपालिका, कैलारी गाउँपालिकाले वार्षिक समीक्षा सम्पन्न गरेको स्वास्थ्य कार्यालय कैलालीका प्रमुख रमेश कुँवरले निशाना न्युजलाई जानकारी दिए ।
उनले धनगढी उपमहानगरपलिका,गोदावरी नगरपािलका,घोडाघोडी नगरपालिका ,लम्कीचुहा नगरपालिका ,भजनी नगरपालिका र जानकी गाउँपालिकाले वार्षिक समीक्षा सम्पन्न गरेपछि स्वास्थ्य कार्यालय कैलालीले सुरु गर्ने बताए ।
जेनजी आन्दोलनका कारण समीक्षा ढिलो हुनुले अली समस्या भएको उनले बताए ।
स्वास्थ्य कार्यालय कैलालीका सूचना अधिकारी मीनबहादुर धामीले स्थानीय तहहरुको समीक्षा सम्पन्न हुना साथ हामीले समीक्षा गर्ने तयारीमा जुटेको बताए ।
उनले भने ‘वार्षिक समीक्षामा तथ्याङ्क विश्लेषण हुन्छ । लक्ष्य अनुसार प्रगति भए नभएको मुल्याङ्कनका साथै तीन बर्ष सम्म भएका कामको तुलना पनि हुन्छ ।’ त्यस्तै कम प्रगति हुनुको कारण,समस्याको पहिचान समाधानको उपाय,नीति नियमहरुको कार्यान्वयनका बिषयहरुमा पनि समीक्षामा छलफल हुने उनले बताए ।
आधारभूत स्वास्थ्य सेवा प्रगतिको अवस्था,भौतिक तथा वित्तीय अवस्था,स्वास्थ्य संस्थाको विवरण प्रस्तुत पनि समीक्षा कार्यक्रममा हुने स्वास्थ्य कार्यालय कैलालीका परिवार नियोजन अधिकृत ओलट नारायण चापागाईले जानकारी दिए । सबै पालिकाको समीक्षा सम्पन्न पश्चात उत्कृष्ट काम गर्ने स्वास्थ्यकर्मी,स्वास्थ्य संस्थालगायतलाई पनि सो कार्यक्रममा पुरस्कृत गरिने स्वास्थ्य कार्यालय कैलालीकी ईश्वरी भट्टले जानकारी दिइन् ।
