कैलाली । सुदूरपश्चिम प्रदेशमा यो वर्ष कृषकलाई मलको अभाव नहुने भएको छ । कैलालीको धनगढीस्थित कृषि सामाग्री कम्पनी लिमिटेडले सो कुराको जानकारी दिएको हो ।
चालु आर्थिक वर्षको साउनदेखि मल आउन सुरु गरेको कृषि सामाग्री कम्पनी लिमिटडका प्रादेशिक प्रबन्धक नवलसिंह बोगटीले निशाना न्युजलाई जानकारी दिए । कृषि सामाग्री कम्पनी लिमिटेड धनगढीमा युरिया २४८९ मेट्रिकटन र डिएपी ८९७९ मेट्रिकटन आएको उनले बताए । डिएपीको समस्या नभएको र युरिया २ हजार मेट्रिकटन आउन बाँकी रहेको उनको भनाइ छ ।
युरिया मल आउन ढिलाइका कारण अपुग भएको गुनासो आइरहेको भएपनि मल अभाव नहुने उनले बताए । उनले भने ‘लोड अनलोडमा ढिलाइले यहाँ पुग्न सकेको छैन, सोमबारसम्ममा पुग्छ ।’
सुदूरपश्चिम प्रदेशमा साल्टट्रेडिङ कर्पोरेशन लिमिटेड र कृषि सामाग्री कम्पनीबाट मल बिक्री वितरण भइरहेको छ । साउनयता साल्टट्रेडिङमा ४६९८ मेट्रिकटन डिएपी र १८०१ मेट्रिकटन युरिया आइसकेको साल्टट्रेडिङ कर्पोरेशन लिमिटेडका कर्मचारी रामचन्द्र जोशीले बताए । अझै ५०० मेट्रिकटन डिएपी आउन बाँकी रहेको उनले बताए ।
यो वर्ष कृषकलाई मल अभाव नहुने उनले बताए । सुदूरपश्चिम प्रदेशका चार सय सहकारीमार्फत मल बिक्री वितरण भइरहेको उनले बताए । युरिया मल प्रतिक्विन्टल १८७३ रुपैयाँ र डिएपी ४ हजार ७ सय ७३ रुपैयाँमा बिक्री वितरण भइरहेको छ । पोटास ३५७३ रुपैयाँमा बिक्री वितरण भइरहेको कृषि सामाग्री कम्पनी लिमिटेडले जनाएको छ ।
