धनगढी । प्रेस सेन्टर नेपालले अनलाइन सञ्चारमाध्यम दर्ता तथा नवीकरण शुल्क तोकिएकोमा प्रेस सेन्टरको आपत्ति जनाएको छ । आज प्रेस विज्ञप्ति जारी गर्दै प्रेस सेन्टर नेपालले आपत्ति जनाएको हो ।
प्रेस सेन्टर नेपालका महासचिव मनोज घर्तीमगरद्वारा हस्ताक्षति विज्ञप्तिमा भनिएको छ ‘सरकारले छापाखाना र प्रकाशन सम्बन्धी (दोस्रो संशोधन) नियमावली, २०८२ जारी गरी अनलाइन सञ्चारमाध्यमको दर्ता तथा नवीकरणसम्बन्धी गरेको कतिपय प्रावधानप्रति प्रेस सेन्टर नेपालको गम्भीर ध्यानाकर्षण भएको छ ।’
अनलाइन सञ्चारमाध्यमको दर्ता र नवीकरण यसअघि झैँ निःशुल्क हुनुपर्ने विज्ञप्तिमा उल्लेख छ । विज्ञप्तिमा भनिएको छ ‘निःशुल्क रूपमा हुँदै आएको अनलाइन सञ्चारमाध्यम दर्ताका लागि राखिएको पाँच हजार र नवीकरणका लागि राखिएको दुई हजार पाँच सय रुपैयाँ शुल्कको प्रेस सेन्टर नेपाल विरोध गर्दछ ।’
प्रदेश कानुनबमोजिम प्रदेशमै हुने दर्ता तथा नवीकरणलाई निरन्तरता दिँदै, संघीयताको मर्मअनुसार स्थानीय तहमै अनलाइन सञ्चारमाध्यमको दर्ता तथा नवीकरण गर्ने व्यवस्था हुनुपर्ने प्रेस सेन्टरले माग गरेको छ ।
त्यसो नहुँदासम्म अनलाइन तथा जिल्ला हुलाक कार्यालयमार्फत सूचना तथा प्रसारण विभागमा दर्ता तथा नवीकरणको काम हुनुपर्ने विज्ञप्तिमा उल्लेख छ ।
अनलाइन सञ्चारमाध्यम दर्ता तथा नवीकरणका लागि तोकिएको शुल्क हटाउनु पर्ने, स्थानीय तहबाटै दर्ता तथा नवीकरणको कार्य हुनुपर्ने प्रेस सेन्टर नेपालले माग गरेको छ ।
‘अन्य सञ्चारमाध्यमजस्तै अनलाइनलाई पनि लोककल्याणकारी विज्ञापन उपलब्ध गराउने प्रावधानसहित छापाखाना र प्रकाशन सम्बन्धी (दोस्रो संशोधन) नियमावली, २०८२ लाई संशोधन गर्न प्रेस सेन्टर नेपाल माग गर्दछ’ विज्ञप्तिमा उल्लेख छ ।
