धनगढी । धनगढी उपमहानगरपालिकाले पुनः शनिबारिय महिला उद्यमी मेला सुरु गरेको छ । यसअघि उपमहानगर व्यवस्थापनमा हरेक शनिबार लाग्ने मेला बर्षादको समयमा स्थगित भएकोमा आजदेखि पुनः सञ्चालन भएको हो ।
मेला सुरु भएसँगै महिलाहरु उद्यमीहरु उत्साहित भएकी छन् । मेलामा व्यवसाय सञ्चालन गर्दै आएकी धनगढी उपमहानगरपालिका–५ की सुनिता रानाले मेला सुरु हुँदा आफू उत्साहित भएको बताइन् ।
उनले भनिन् ‘उपमहानगरले फेरि मेला सुरु गर्नु एकदमै खुशीको कुरा हो । गत वर्ष पनि मैले यहाँ स्थानीय परिकार ल्याएर बेच्ने गरेकी थिए । मैले स्थानीय कुखुराको परिकार बनाउने गरेकी छु ।’
मेलाले आम्दानीसँगै स्थानीय परिकार संरक्षण,प्रवद्र्धन गर्नमा समेत टेवा पुग्ने उनले बताइन् । उनले भनिन् ‘हाम्रो मौलिकता, संस्कार, पहिचानलगायत हरेक कुरालाई प्रवद्र्धन गर्नुपर्छ । जुन यो मेलाबाट पनि भइरहेको छ ।’
धनगढी उपमहानगरपालिका–४ की पुष्पाञ्जली सिंह मल्लले पनि मेला उद्यमी महिलाका लागि उपयोगी भएको बताइन् । उनले भनिन् ‘आजबाट शनिबारिय मेला फेरि सुरु भएको छ । गत वर्ष पनि हामीले यहाँ आफ्ना स्थानीय परिकार बिक्री गरेका थियौँ । मेला एकदमै राम्रो छ ।’
उनले घरमा बसेर मोवाइल चलाउनु भन्दा आफूले जानेको सीप प्रयोग गरेर बनाइएका स्थानीय परिकार बिक्रीबाट आम्दानी पनि हुने भएकाले मेला राम्रो भएको बताइन् ।
महिलालाई उद्यमतिर अग्रसर गराउने उद्देश्यले गत वर्षदेखि उपमहानगर सञ्चालनमा ल्याएको शनिबारिय मेलामा महिला उद्यमीहरूले उत्पादन गरेका सामग्री र खानपानलाई बिक्री गरिँदै आएको छ ।
शनिबारिय मेलामा व्यापार सञ्चालन गरेकी ज्ञानु चन्द मल्लले स्थानीय परिकार बिक्रीबाट लगानीको दोब्बर फाइदा हुने गरेको बताइन् ।
धनगढी उपमहानगरपालिका–१ पार्कमोड अगाडि जेनजी मार्गमा सुरु भएको मेलाका लागि स्टल, टेन्ट, टेबुल, मोबाइल शौचालय लगायतको व्यवस्थापन गरिएको छ ।
