धनगढी- कैलाली क्षेत्र नम्बर ५ बाट प्रतिनिधिसभा सदस्यका स्वतन्त्र उम्मेदवार पुष्करनाथ ओझाले गोजीभरी टन्न पैसा बोकेर गयो भने धनगढीबाट चुनाव जितेर प्रतिनिधिसभामा जान सकिन्छ भन्ने भ्रम रहेको बताएका छन् । आइतबार उम्मेदवारी दर्तापछि सञ्चारकर्मीहरूसँग प्रतिक्रिया दिँदै ओझाले जुन भ्रम सिर्जना गरेर धनगढीको धमिलो इमेज बनाउने प्रयत्न भएको छ त्यसलाई सफा गर्न त्यसलाई खण्डित गर्न आफ्नो उम्मेदवारी रहेको बताए।
‘धनगढीका मानिसहरू आत्म सम्मान युक्त जीवन जिउने मानिसहरू हुन् । भन्ने यहाँ सत्ता र पैसाको बलमा मात्रै निर्वाचित हुने सम्भावना छैन भन्ने म प्रमाणित गराउन चाहन्छु,’ ओझाले भने । राजनीतिक दलहरू जनताका सम्पत्ति भए पनि छोटो समयमा जनताको सम्पत्तिभन्दा केन्द्रमा पुगेका मानिसको पारिवारिक सम्पत्ति हुन थालेको बताए ।
राजनीति दलहरूलाई नेपाली जनताको सम्पत्ति बनाउनुपर्ने उनले जोड दिएका थिए । यस निर्वाचनमा दलका निर्णयलाई असहमति व्यक्त गर्दै स्वतन्त्र उम्मेदवारी दिएर निर्वाचन लागि उपयोग र सदुपयोग गर्न आफ्नो उम्मेदवारी रहेको ओझाले बताए । ‘यस क्षेत्रको आर्थिक विकासको खास गरी पूर्वाधारको क्षेत्रमा सुदूरपश्चिम त्यसमा पनि केन्द्र धनगढी मुलुकका अन्य शहरभन्दा हामी निकै पछाडि छौँ’, त्यस विषयमा विकास निर्माणका कुरामा आफ्नो पुरानो अनुभव रहेको ओझाले बताए ।
अबको प्रतिनिधिसभाको सदस्य भएर थप योगदान गर्न सकिन्छ भन्ने मान्यता रहेको उनले बताए । यहाँका सबै पक्षका राजनीतिक दलहरूलाई अर्थसामाजिक पक्षहरूलाई साथमा लिएर यस क्षेत्रको विकासका लागि योगदान गर्ने आफ्नो अठोट रहेको उनको भनाइ छ । ‘म निर्दलीय उम्मेदवार भए तापनि मतदाताको स्तरमा आफूलाई सर्वदलीय उम्मेदवार बनाउन म त्यसका लागि प्रयत्नरत छु,’ ओझाले भने ।
