धनगढी । घरेलु तथा साना उद्योग कार्यालय कैलालीमा तीन महिनामा १५६ उद्योग र २ सय वाणिज्य सम्बन्धी फर्म दर्ता भएका छन् ।
चालु आव २०८२/८३ को साउनदेखि असोजसम्मको अवधिमा उक्त उद्योग दर्ता तथा वाणिज्य सम्बन्धी फर्म भएका हुन् ।
दर्ता भएका १५६ उद्योगमध्ये ३२ वटा उत्पादनमूलक, ५० वटा कृषिमूलक र ७४ वटा सेवामूलक रहेको कार्यालयका उद्योग प्रशासन शाखा प्रमुख वालाराम भाटले जानकारी दिए ।
उनका अनुसार चालु आवको सो अवधिमा ५३ वटा घरेलु तथा साना उद्योग र वाणिज्यतर्फका १०९ गरी १६२ वटा फर्मको लगतकट्टा गरिएकोे छ ।
कार्यालयले चालु आवको तीन महिनाको अवधिमा विभिन्न शीर्षकमा ३९ लाख ९१ हजार ६९९ रुपैयाँ राजस्व संकलन गरेको जनाइएको छ ।
गत आव २०८१/८२ को असारमसान्त सम्म जिल्लामा घरेलु तथा साना उद्योग दर्ताको सङ्ख्या १५ हजार ९२३ र वाणिज्यतर्फका फर्मको सङ्ख्या २४ हजार ७६८ पुगेको उद्योग प्रशासन शाखा प्रमुख भाटले जानकारी दिए ।
घरेलु तथा साना उद्योग कार्यालयका अनुसार गत आव २०८१/८२ मा ५९८ घरेलु तथा साना उद्योग र वाणिज्यतर्फ ५६३ फर्म दर्ता भएका थिए ।
कार्यालयले गत आवमा १ करोड ६३ लाख ९७ हजार राजस्व संकलन गरेको जनाइएको छ ।
