कैलाली । अछामको साँफेबगर नगरपालिका-३ हाटबजारमा शनिबार राति भएको आगलागीबाट पीडितलाई सुदूरपश्चिम प्रदेश सरकारले आर्थिक सहयोग गर्ने निर्णय गरेको छ ।
बुधबार मुख्यमन्त्री कमलबहादुर शाहको अध्यक्षतामा मुख्यमन्त्री निवासमा बसेको प्रदेश विपद् व्यवस्थापन परिषद्को बैठकले अछामका आगलागी पीडितका लागि साँफेबगर नगरपालिकालाई तत्काल ८ लाख आर्थिक सहयोग गर्ने निर्णय गरेको हो ।
मुख्यमन्त्री शाहले अछामका आगलागी पीडित भएका परिवार तथा व्यवसायीलाई ८ लाख रुपैयाँ सहयोग गर्ने निर्णय भएको बताए । उनले भने, शनिबार राति साँफेबगर बजारमा भएको आगलागीबाट क्षति पुगेका परिवार तथा व्यवसायीलाई मानवीय सहायता स्वरुप तत्कालका लागि ८ लाख रुपैयाँ पालिकामार्फत् उपलब्ध गराउने निर्णय भएको छ ।
सम्बन्धित पालिकाले स्पष्ट मापदण्ड तयार पारेर उक्त मानवीय सहायता रकम आगलागी पीडितलाई वितरण गर्ने जनाइएको छ ।
यस्तै बैठकले २०८२ साल भाद्र महिनामा दार्चुला जिल्लाको व्यास गाउँपालिका– १ स्थित टिङ्कर र छाङरु क्षेत्रमा आएको बाढीपहिरोबाट क्षतिग्रस्त भएका पुलहरूको तत्काल पुनर्निर्माणका लागि भौतिक पूर्वाधार विकास मन्त्रालयलाई सिफारिस गर्ने निर्णय गरेको जनाइएको छ ।
त्यस्तै, कञ्चनपुरको लालझाडी गाउँपालिका, बेलौरी, शुक्लाफाँटा, बेदकोट, भीमदत्त र दोधरा चाँदनी नगरपालिकामा वन्यजन्तुको आक्रमणबाट हुने मानवीय क्षति, मानव बस्तीमा आक्रमण र खेतबारीमा हुने बालीनाली नोक्सानी न्यूनीकरण गर्नका लागि रोकथाम उपायहरु अवलम्बन गर्न र टर्चलाइटलगायतका सुरक्षा उपकरण स्थानीयस्तरमा वितरणका लागि आवश्यक प्रबन्ध गर्न उद्योग, पर्यटन, वन तथा वातावरण मन्त्रालयलाई सिफारिस गर्ने निर्णय गरेको छ।
