कैलाली । धनगढी उपमहानगरपालिका–७ स्थित देवहरिया वनस्पती उद्यानमा रहेको जखौरताल किनारमा उम्रिएका झारहरुलाई सफाई गरिन थालिएको छ ।

सरसफाईका लागि दैनिक ६ जनाको टोली लागेको जनाइएको छ । दैनिक ७५५ रुपैयाँ ज्यालादारीमा उनीहरुले काम गरिरहेको वनस्पती अनुसन्धान केन्द्र कैलालीका प्रमुख गंगादत्त भट्टले निशाना न्युजलाई जानकारी दिए ।

देवहरिया वनस्पति उद्यानमा ३ वटा ताल रहेको उनले बताए । यहाँ ३ वटा ताल मध्ये जखौर ताल,मुरखट्टी,मुरखुट्टा ताल रहेको उनले बताए । झारपातका कारण तालको सोभा नै बिग्रन थालेपछि सफाई अभियानलाई तीब्रता दिएको उनको भनाइ छ ।

‘तालभित्र जलीय वनस्पतिको राम्रो उपस्थित भएको पाइन्छ’ उनले भने ‘विशेषगरी ३ किसमका कमलका फूलहरु तालमा फुलिरहेको देख्न पाइन्छ । तालभित्र उम्रेका झारपातका कारण जलीय वनस्पती नै लोपहुने र कमलका फूलहरुको अस्तित्व गुम्ने खतरा हुनुले सरसफाईलाई तीब्रता दिएको उनले बताए ।

देवहरियामा महत्वपूर्ण जलीय वनस्पतीको राम्रो उपस्थिति

यहाँ फूलने तीन वटा कमलमध्ये १ प्रजातिको कमल रातको १२ बजे फक्रिने र दिउँसोको समयमा सिउडिने गरेको उनले बताए । यस्को अलवा तालको छेउछाउमा जंगली धान र महत्वपूर्ण जलीय वनस्पतीको राम्रो उपस्थिति रहँदै आएको उनले बताए ।

५०० भन्दा वढी प्रजातिका वनस्पती,५० भन्दाबढी प्रजातिका चराहरु

उद्यानमा ५०० भन्दा वढी प्रजातीका वनस्पती पाइनुका साथै ताल क्षेत्रमा चरचुरुङ्गीको प्रमुख वासस्थान पनि रहँदै आएको उनले बताए ।

हिउँद महिनामा ५० भन्दा वढी प्रजातिका चराहरु देखिनुका साथै यस्को अलवा पुतली,किरा फट्याङग्रा र विभिन्न प्रजातिका माछाहरु पनि तालमा पाइने गरेको उनको भनाइ छ ।

‘यो उद्यान शैक्षिक उदेश्य प्राप्तीका लागि महत्वपूर्ण गन्तव्य स्थल हुन गएको छ’ उनले भने ‘उद्यानमा स्वस्थानीय वनस्पतीहरु,परस्थानीय वनस्पतिहरु र जडीवुटीजन्य वनस्पति प्रजातिको लेवलिङ सहित सूचना प्रवाह गरेको पाइन्छ ।’ उद्यानभित्र दैनिक २०० जना आन्तरिक पर्यटक घुम्न आउने गरेको उनले बताए ।

तेजपात,कुरिलो,चिउरी,निम,शीतल चिनि,बोझो आदि वनस्पती बिरुवा निःशुल्क वितरण पनि गर्दै आएको उनले बताए । उद्यानमा सुदूरपश्चिम प्रदेशमा पाइने सुगन्धित वनस्पतीको तेल निकालेर मात्रा के छ,तत्व के पाइन्छ भनेर अध्ययन अनुसन्धान गरिँदै आएको उनले बताए ।

प्रमुख भट्टका अनुसार यो क्षेत्र सुदूरपश्चिमकै गन्तव्य स्थल बन्न सक्ने बताए । तीन वटा ठूला ताल रहेको यो क्षेत्रमा सम्भावन धेरै रहेका उनले बताए । साधन स्रोत सहि सदुपयोग गर्दै अगाडि बढे यो क्षेत्र सुदूरपश्चिमकै नमुना क्षेत्र बन्ने उनको तर्क छ ।