धनगढी । कैलालीमा जिपको ठक्करबाट एक जनाको मृत्यु भएको छ भने तीन जना घाइते भएका छन्।
आइतबार बिहान पूर्वपश्चिम राजमार्ग अन्तर्गत घोडाघोडी नगरपालिका–२ टनकपुरमा पूर्वबाट पश्चिमतर्फ आउँदै गरेको लु २ च २३५८ नम्बरको तरकारी बोकेको जिपले साइकल यात्री र पैदल यात्रुलाई ठक्कर दिएको प्रहरीले जनाएको छ।
जिपको ठक्करबाट साइकल यात्री बर्दगोरिया गाउँपालिका–६, कोटा तुल्सिपुर बस्ने ५५ वर्षीय शंकर डगौराको मृत्यु भएको जिल्ला प्रहरी कार्यालय कैलालीले जनाएको छ । गम्भीर घाइते डगौरालाई उपचारका लागि घोडाघोडी अस्पताल लगिएकोमा चिकित्सकले मृत घोषणा गरेको जनाइएको छ।
दुर्घटनामा अन्य तीन जना घाइते भएका छन्। घाइते हुनेमा पैदल यात्री घोडाघोडी नगरपालिका–२, साडेपानीका ५४ वर्षीय पदमबहादुर शाही, बर्दगोरिया गाउँपालिका–६, कोटा तुल्सिपुर बस्ने ५४ वर्षीय हर्कबहादुर डगौरा र बर्दगोरिया–६ कै २५ वर्षीय कृष्ण डगौरा रहेको प्रहरीले जनाएको छ । उनीहरुको घोडाघोडी अस्पतालमा उपचार भइरहेको छ।
जिप र चालक रोल्पाको त्रिवेणी गाउँपालिका–४ बस्ने २३ वर्षीय सन्तोष घर्तीमगरलाई प्रहरीले नियन्त्रणमा लिएको छ।
