धनगढी । सुदूरपश्चिम प्रदेशका मुख्यमन्त्री कमलबहादुर शाहले यही फागुन २१ गते हुने निर्वाचनलाई भयरहित र शान्तिपूर्ण रूपमा सम्पन्न गराउन मातहतका सबै निकायलाई निर्देशन दिएका छन ।

मंगलबार विभागीय मन्त्री, राज्यमन्त्री, विभागीय सचिव, कैलालीका प्रमुख जिल्ला अधिकारी तथा प्रदेशस्थित चारै सुरक्षा प्रमुख सहितको बैठकमा निर्वाचन सफल रुपमा सम्पन्न गराउनु प्रदेश सरकारको समेत जिम्मेवारी भएकोले सबैले आ आफ्नो भूमिका निर्वाह गर्न उनले निर्देशन दिएका हुन ।

बैठकमा मुख्यमन्त्री शाहले संघीय सरकार र संघीय नेतृत्वले निर्वाचन गराउन राज्यका सबै सयन्त्र परिचालन गरिसकेको अवस्थामा ठाउँ ठाउँमा निर्वाचन समाग्री पुगिसकेको बताउँदै प्रदेश सरकारको तर्फबाट आवश्यक समन्वय र सहयोग गरिने स्पष्ट पारे।

बैठकमा आर्थिक मामिला मन्त्री बहादुरसिंह थापा, सामाजिक विकास मन्त्री मेघराज खड्का, आन्तरिक मामिला तथा मन्त्रालय कानून मन्त्री हीरा सार्की, भूमि व्यवस्था, कृषि तथा सहकारी मन्त्री वीरबहादुर थापा, सामाजिक विकास राज्यमन्त्री सरस्वती खडका, भौतिक पूर्वाधार विकास राज्यमन्त्री निर्मलादेवी साउँद, प्रमुख सचिव बैकुण्ठ,कैलालीका प्रमुख जिल्ला अधिकारी हिरालाल रेग्मीलगायत चार वटै सुरक्षा निकायका प्रमुखको उपस्थित रहेको थियो ।

साथै बैठकले राष्ट्रिय प्रजातन्त्र दिवस-२०८२ भव्यताका साथ मनाउने निर्णय गरेको छ। फागुन ७ गते राष्ट्रिय प्रजातन्त्र दिवस भव्यताका साथ मनाउन मुख्यमन्त्रीको अध्यक्षतामा राष्ट्रिय प्रजातन्त्र दिवस समारोह समिति, २०८२ गठन गरिएको छ ।

जसको सदस्यमा मन्त्रीहरु, कैलाली जिल्ला समन्वय समिति प्रमुख, प्रदेश सरकारका प्रमुख सचिव, धनगढी उपमहानगरपालिका प्रमुख, पृतनापति, उपरथी प्रदेश सरकारका सचिवहरु कैलालीका प्रमुख जिल्ला अधिकारी, सुदूरपश्चिम प्रदेश प्रहरी कार्यालय प्रहरी नायव महानिरीक्षक, सशस्त्र प्रहरी बल नेपालका वाहिनीपति, राष्ट्रिय अनुसन्धान विभागका अनुसन्धान निर्देशक रहेका छन भने आन्तरिक मामिला तथा कानून मन्त्रालय सचिव सदस्यसचिव रहेका छन ।

राष्ट्रिय प्रजातन्त्र दिवस २०८२ को अवसरमा २०८२ फागुन ६,७ र ८ गते प्रदेश तथा स्थानीय तहका सम्पूर्ण सरकारी निकाय, प्रतिष्ठान, संघ संस्थाका कार्यालयहरुको छत, वरण्डा र परिसरमा निर्धारित साईजका राष्ट्रिय झण्डा मर्यादापूर्वक राखी सजाउने र साँझ दीप प्रज्वलन गर्ने तथा प्रादेशिक र स्थानीयस्तरका विधुतीय तथा छापा सञ्चार माध्यमबाट राष्ट्रिय प्रजातन्त्र दिवससँग सम्बन्धित विभिन्न सन्देश तथा कार्यक्रमहरु प्रशारण प्रकाशन गर्न लगाउने निर्णय भएको छ ।