धनगढी । सुदूरपश्चिम प्रदेशका आन्तरिक मामिला तथा कानुनमन्त्री हीरासिंह सार्कीले सञ्चार क्षेत्रको विकासका लागि सधैँ प्रतिवद्ध रहेको बताएका छन् ।

राष्ट्रिय समाचार समिति (रासस)को ६५औं वार्षिकोत्सवको अवसरमा राससको सुदूरपश्चिम प्रदेश कार्यालयले बिहीबार धनगढीमा आयोजना गरेको ‘स्थानीय सञ्चार माध्यम र रासस सेवाग्राही प्रवद्र्धन’ बिषयक अन्तरक्रिया कार्यक्रममा बोल्दै उनले यस्तो बताएका हुन् ।

उनले मिडियाहरु समय अनुसार परिवर्तन हुनुपर्ने बताउँदै राससले पनि अझै परिस्कृत भएर सेवा दिन आवश्यक रहेको बताए ।
उनले भने ‘राससको समाचार सेवा प्रभावकारी छ । अझ समयानुकुल सेवा प्रवाहमा जोड दिन आवश्यक छ ।’

सरकारलाई सचेत गराउन तथा नागरिकलाई सुसुचित गर्न सञ्चार माध्यमको भूमिका महत्वपूर्ण हुने उनले बताए । उनले भने ‘देश निर्वाचनको समय छ,पत्रकारहरुले आचारसंहिता पालना गरि समाचार सम्प्रेषण गर्न आग्रह गर्दछु ।’

कार्यक्रममा बोल्ने बक्ताहरुले सञ्चार माध्यमहरुले विश्वसनीय,सत्यतथ्य समाचार सम्प्रेषण गर्नुपर्नेमा जोड दिएका थिए ।
कार्यक्रममा बोल्दै नेपाल पत्रकार महासंघका केन्द्रीय सदस्य योगेन्द्र बलायर,महासंघका सुदूरपश्चि प्रदेश अध्यक्ष भरत शाह,महासचिव शिवराज भट्टले राससको समाचार सेवा अझ समयअनुसार परिमार्जित गरेर लैजानु पर्नेमा जोड दिए ।

रासस सेवाग्राही दिनेश खवरका सम्पादक नारायण अवस्थीले रासस समाचार सेवाले सञ्चार माध्यमको समाचार अभावलाई पूर्ति गर्ने काम गरेको बताए । उनले अझै समाचार सख्या बढी भए राम्रो हुने बताए । राससका सुदूरपश्चिम प्रदेश कार्यालय प्रमुख सिद्धराज भट्टको अध्यक्षतामा भएको कार्यक्रममा रासस सेवाग्राही तथा विभिन्न सञ्चारमाध्यमका सञ्चारकर्मीलगायतको उपस्थिति रहेको थियो ।