काठमाडौं । देशका विभिन्न स्थानमा भएका छुट्टाछुट्टै सवारी दुर्घटनामा सात जनाको मृत्यु भएको छ।
नेपाल प्रहरीको केन्द्रीय समाचार कक्षका अनुसार धादिङको गजुरी गाउँपालिका–६ बन्छेटारमा बिग्रिएर सडकमा रोकी राखिएको ना.६ ख ३१०६ नम्बरको ट्रकमा बा.७२ प ६९४८ नम्बरको मोटरसाइकल ठोक्किँदा आइतबार राति मोटरसाइकल चालक गल्छी गाउँपालिका–२ भुतिया बस्ने ५६ वर्षीय खड्ग प्रसाद खतिवडाको मृत्यु भएको छ। गम्भीर घाइते भएका उनको प्राथमिक स्वास्थ्य केन्द्र गजुरीमा उपचारका क्रममा मृत्यु भएको हो। ट्रक चालकलाई प्रहरीले नियन्त्रणमा लिएको छ।
धनुषाको धनौजी गाउँपालिका–३ कटैया चोकमा प्रदेश २–०२–००१ प १४९६ र ज.९ प ६९६७ नम्बरका दुई मोटरसाइकल एकआपसमा ठोक्किँदा आइतबार दिउँसो ज.९ प ६९६७ नम्बरको मोटरसाइकल चालक धनौजी गाउँपालिका–४ बस्ने २५ वर्षीय अंकित कुमार मण्डलको मृत्यु भएको छ। गम्भीर घाइते भएका उनको प्रादेशिक अस्पताल जनकपुरमा उपचारका क्रममा मृत्यु भएको हो। दुर्घटनामा घाइते अन्य दुई जनालाई थप उपचारका लागि न्यूरो अस्पताल जनकपुर रिफर गरिएको छ।
महोत्तरीको औरही नगरपालिका–३ श्रीपुरटोलमा ज.४ प ४६६० नम्बरको मोटरसाइकल अनियन्त्रित भई आइतबार राति दुर्घटना हुँदा चालक ३० वर्षीय रंजीत साहको मृत्यु भएको छ। गम्भीर घाइते भएका उनको जानकी एकेडेमी अस्पताल पर्सामा उपचारका क्रममा मृत्यु भएको हो।
बाँकेको राप्तीसोनारी गाउँपालिका–६ डाँडाटपरीमा कुण्डाचोकबाट बैजापुरतर्फ जाँदै गरेको भे.२ प ८१७ नम्बरको मोटरसाइकल अनियन्त्रित भई आइतबार साँझ दुर्घटना हुँदा मोटरसाइकलमा सवार सोही गाउँपालिका–३ चिनावास बस्ने ३५ वर्षीय हरीराम थारुको मृत्यु भएको छ। गम्भीर घाइते भएका उनको संजिवनी मेडिकल कलेज नेपालगन्जमा उपचारका क्रममा मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ।
रूपन्देहीको रोहिणी गाउँपालिका–३ लक्ष्मीनगरमा लु.७३ प २१२० नम्बरको मोटरसाइकल र मधेश प्रदेश ०३–००२ ख ३३६१ नम्बरको ट्रक ठोक्किँदा आइतबार दिउँसो मोटरसाइकलमा सवार २१ वर्षीय आशिष यादवको मृत्यु भएको छ। गम्भीर घाइते भएका उनको मेडिकल कलेज भैरहवामा उपचारका क्रममा मृत्यु भएको हो। दुर्घटनामा घाइते अर्का एक जनाको सोही अस्पतालमा उपचार भइरहेको छ। ट्रक चालकलाई प्रहरीले नियन्त्रणमा लिएको छ।
बाराको जीतपुरसिमरा उपमहानगरपालिका–२२ मा बा.प्र.०१–००६ ख ९९७७ नम्बरको बसले प्र.३–०२–०१३ प ३०२१ नम्बरको मोटरसाइकललाई गए राति ठक्कर दिँदा मोटरसाइकल चालक गोरखा बस्ने अन्दाजी ३५ वर्षीय रामकुमार कोइरालाको मृत्यु भएको छ। गम्भीर घाइते भएका उनको प्रादेशिक अस्पताल कलैयामा उपचारका क्रममा मृत्यु भएको हो। दुर्घटनामा घाइते अर्का एक जनाको सोही अस्पतालमा उपचार भइरहेको छ। बस चालकलाई प्रहरीले नियन्त्रणमा लिएको छ।
स्याङ्जाको गल्याङ नगरपालिका–९ साङलियामा चापाकोटबाट गल्याङतर्फ आउँदै गरेको ग.१८ प ११०९ नम्बरको मोटरसाइकल अनियन्त्रित भई आइतबार बेलुकी दुर्घटना हुँदा चालक ५४ वर्षीय ज्योतिलाल खनालको मृत्यु भएको छ। गम्भीर घाइते भएका उनको प्राथमिक स्वास्थ्य केन्द्र वालिङमा उपचारका क्रममा मृत्यु भएको हो।
दुर्घटनाबारे प्रहरीले आवश्यक अनुसन्धान गरिरहेको जनाइएको छ।
