धनगढी । गत फागुन २१ गते सम्पन्न प्रतिनिधिसभा सदस्यका निर्वाचनमा कैलाली क्षेत्र नं. ५ का नेपाली कम्युनिस्ट पार्टी (नेकपा) उम्मेदवार प्रेमबहादुर आलेले कांग्रेसका ५७ जनाले आफूबाट पैँसा लिएको भन्ने आरोपमा कुनै सत्यता नरहेको बताएका छन ।
उनले आज एक विज्ञप्ति जारी गर्दै कांग्रेसका उम्मेदवार नरनारायण शाह ‘मनु’ले लगाएको आरोप पूर्ण रूपमा असत्य,भ्रामक, आधारहीन र कपोकल्पित दुष्प्रचार भएको बताएका छन ।
आलेले प्रतिनिधिसभाको निर्वाचन परिणाम स्वीकार गर्दै मतदातालाई धन्यवाद तथा निर्वाचित उम्मेदवारलाई बधाई दिएको स्मरण गराउँदै चरित्र हत्या गर्ने उद्देश्यले दुष्प्रचार गरिएको बताएका छन्।
उनले आफू विगतदेखि डोटी जिल्लाबाट विभिन्न संसदीय निर्वाचनमा सहभागी हुँदै आएको र यसपटक कैलाली क्षेत्र नं. ५ मा उम्मेदवारी दिँदा कांग्रेसका स्थानीय नेताहरूसँग सामान्य चिनजान समेत न्यून रहेको अवस्थामा यस्तो आरोप लगाइनु निराधार भएको बताए ।
आलेले यस्ता आरोपमार्फत आफ्नो राजनीतिक छवि धुमिल पार्ने प्रयासप्रति भर्त्सना गर्दै आरोपको कुनै प्रमाण भए सार्वजनिक गर्न चुनौती दिएका छन्।
अन्यथा झुटा आरोप फैलाउनेविरुद्ध कानुनी प्रक्रिया अघि बढाउने चेतावनी पनि उनले दिएका छन्।
उनले सत्य तथ्य बाहिर ल्याउन र जनतामा भ्रम नफैलाउन सबै पक्षलाई अनुरोध गरेका छन्।
कांग्रेसका उम्मेदवार शाहले धनगढीको एक अनलाइनलाई दिएको अन्तरवार्तामा आलेले आफूबाट कांग्रेसका ५७ जनाले पैसा लिएको सुची दिएको बताएका थिए ।
शाहले भनेका थिए ‘जो चुनावमा तेस्रो स्थानमा आउनु भएको थियो, उहाँले आएर मलाई एउटा लिस्ट नै दिनुभयो । तपाईंप्रति मेरो सद्भाव छ भन्दै तपाईंका यी मान्छेले मबाट आर्थिक सहयोग लिनुभएको हो भनेर भन्नुभयो ।’
२१ फागुनको निर्वाचनमा कैलाली ५ मा नेकपा उम्मेदवार आले तेस्रो भएका थिए ।
