धनगढी । सुदूरपश्चिम प्रदेशका भूमि व्यवस्था,कृषि तथा सहकारीमन्त्री वीरबहादुर थापाले कृषि क्षेत्रमा दिइने अनुदानमा पारदर्शीता ल्याउनुपर्ने बताएका छन् ।
भेटेरिनरी अस्पताल तथा पशुसेवा विज्ञ केन्द्र कैलालीले बुधबार धनगढीमा आयोजना गरेको ‘जिविकोपार्जन सुधारका लागि भैँसीपालन कार्यक्रम’ सम्बन्धी समन्वयात्मक बैठकमा बोल्दै उनले यस्तो बताएका हुन् ।
उनले भने ‘प्रदेश सरकारबाट कृषि क्षेत्रमा दिइने अनुदानलाई प्रभावकारी बनाउनमा हामीले जोड दिँदै आएका छौँ । आगामी दिनमा पनि यसलाई अझ प्रभाकारी बनाउनमा जोड दिनुपर्छ ।
उनले अनुदानका कार्यक्रम लक्षित वर्ग,समुदाय तथा किसानसम्म पुगाउनु पर्ने बताए । उनले भने ‘किसानले अनुदानका कार्यक्रमका सूचना नपाएको गुनासो सुनिन्छ । सूचनामा किसानको पहुँच बढाउनुपर्छ ।’
त्यस्तै,बैठकमा बोल्दै सुदूरपश्चिम प्रदेशसभाको सामाजिक विकास समितिका सभापति धर्मराज पाठकले किसान छनोट प्रकृयामा पारदर्शिता नहुँदा समस्या हुने गरेको बताउँदै यसलाई पारदर्शी बनाउनुपर्ने बताए ।
बैठकमा बोल्ने अधिकांश वक्ताहरुले प्रदेश सरकारले किसानलाई दिने अनुदानलाई पारदर्शी बनाउनुपर्नेमा जोड दिएका थिए ।
जिविकोपार्जनका लागि भैँसीपालन कार्यक्रम जिल्लाको धनगढी उपमहानगरपालिका, गोदावरी नगरपालिका, गौरीगंगा नगरपालिका, टीकापुर नगरपालिका,लम्कीचुहा नगरपालिका, जोशीपुर गाउँपालिका,बर्दगोरिया गाउँपालिका,जानकी गाउँपालिका र मोहन्याल गाउँपालिकामा सञ्चालन हुने भेटेरिनरी अस्पताल तथा पशुसेवा विज्ञ केन्द्र कैलालीका प्रमुख चन्द्रकान्त पन्तले जानकारी दिए ।
उक्त कार्यक्रम सञ्चालनका लागि रु. दुई करोड २५ लाख बजेट रहेको उनले जानकारी दिनुभयो । सो कार्यक्रममा अनुदान पाउनका लागि कम्तिमा १० जना किसानको समूह हुनुपर्ने तथा १० वटा भैँसीपालन गरेको हुनुपर्ने उनले बताए । बैठकमा कैलाली जिल्लाबाट प्रतिनिधित्व गर्ने प्रदेशसभा सदस्यहरु,कार्यक्रम सञ्चालन हुने पालिकाका जनप्रतिनिधिहरुलगायत सरोकारवालाको सहभागिता रहेको थियो ।
