बाजुरा- बाजुरामा अत्याधिक रक्तश्रापका कारण एक सुत्केरीको मृत्यु भएको छ । जिल्लाको बुढिगंगा नगरपालिका ६ स्थित टाँटे स्वास्थ्य चौकीमा सोमबार राति २० वर्षीया नितु जोशीको मृत्यु भएको हो ।
असोज ३१ गते सुत्केरी व्यथा लाग्ने बितिकै आफन्तले टाँटे स्वास्थ्य चौकीमा लगेका थिए । दिउँसो साढे चार बजे नितुले छोरीलाई जन्म दिएकी थिइन् । स्वास्थ्य चौकीका इन्चार्ज छत्र थापाका अनुसार साल बेरिएको र बच्चा निसासिएको अवस्थामा बच्चा जन्मेको बताए । तर बच्चा जन्माउने बेला सुत्केरी महिलामा कुनै जटिल समस्या नभएको थापाले बताए ।
नितु सामान्य अवस्थामा रहेको भन्दै स्वास्थ्य चौकीले साढे ६ बजे घर पठाएको थियो । आफन्तकै दवावमा सुत्केरीलाई घर पठाइएको थापाले बताए । उनका अनुसार घर लगेको केही समयमा अत्याधिक रक्तस्राब भएपछि सुत्केरीलाई सोमबार राति साढे १० बजे टाँटे स्वास्थ्य चौकीमा ल्याइएको थियो । स्वास्थ्य चौकी पुगाएको २० मिनेटमा नितुको मृत्यु भएको इन्चार्ज छत्र थापाले बताए ।
सामान्य सुत्केरीलाई स्वास्थ्य संस्थाबाट सामान्यतया ८ देखि २४ घण्टासम्म राख्ने गरिन्छ । तर स्वास्थ्य चौकीले नितुलाई सुत्केरी भएको २ घण्टामा घर पठाएको स्थानीय बताउँछन् । उनीहरुले स्वास्थ्यकर्मीको लापरवाहीले घटना भएको आरोप लगाएका छन् । ‘आफन्तले घर लिन खोजेपनि ८ घण्टा पछि मात्र घर पठाउनु पर्ने हो तर, चाँडै घर नपठाउनु पर्ने हो’ स्वास्थ्य संयोजक शाहले वताए ।
नितुलाइ तालिम प्राप्त स्वास्थ्यकर्मीले सुत्केरी सेवा दिएको भएपनि दोस्रो पटक नितुलाइ स्वास्थ्य चौकी लग्दा तालिम प्राप्त स्वास्थ्यकर्मी पनि नभएको पाइएको छ । तालिम प्राप्त स्वास्थ्यकर्मी तारा शाही र प्रमिला कुमारी कार्की भने डिउटीमा नरहेको बुझिएको छ ।
बाजुरामा ३ वर्ष यता नितु लगायत ९ जना सुत्केरीको मृत्यु भइसकेको छ । गर्भवती भएपछि नियमित गर्भजाँचको कमि र समयमै सुत्केरी गराउन स्वास्थ्य संस्था नपुगाउदाको परिणाम रहेको बडिमालिका नगरपालिका स्वास्थ्य शाखा प्रमुख टेक बहादुर खड्काले बताए । अर्को सुत्केरी भएको बेला आराम गर्नुपर्ने, पोषिलो खानेकुरा नखाने, कडा परिश्रमले सुत्केरी महिला ज्यान गुमाउने गरेको उनले बताए । हुनत सरकारले हवाइ उद्धार कार्यक्रम सञ्चालन गरेको छ, तर पनि सुत्केरीले ज्यान गुमाउनेक्रम रोकिएको छैन ।
