कैलाली । सुदूरपश्चिम प्रदेशका मुख्यमन्त्री कमलबहादुर शाहले जनप्रतिनिधिहरुले जनताप्रति उत्तरदायी र जवाफदेही हुनुपर्ने बताएका छन ।
शुक्रबार कैलालीको लम्कीचुहा-४ बलियामा यातायात व्यवस्था सेवा कार्यालयको उद्घाटन गर्दै उनले यस्तो बताएका हुन ।
त्यस्तै उनले मुलुकको विकासका लागि तीनै तहका सरकारबीच समन्वय, सहकार्य र सह-अस्तित्व हुनु आवश्यक रहेको बताए ।
मुख्यमन्त्री शाहले जनतालाई सेवा प्रवाह गर्नका निमित्त प्रदेश सरकार कतिबद्ध भएर लागेको बताए । उनले यातायात व्यवस्था सेवा कार्यालयको स्थापनासँगै यस क्षेत्रका जनताले राहतको अनुभूति गर्नेमा विश्वास ब्यक्त गरे ।
कैलालीको पूर्ववर्ती क्षेत्रका जनतालाई सेवा उपलब्ध गराउनका लागि बलियामा सेवा कार्यालय स्थापना गरिएको हो।
यस क्षेत्रको विकासका लागि चालु आर्थिक वर्षमा प्रदेश सरकारले १ अर्ब बराबरको बहुवर्षीय ठेक्का स्रोत सुनिश्चित गरेको मुख्यमन्त्री शाहले कार्यक्रममा जानकारी दिए ।
लम्कीचुहा प्रादेशिकअस्पतालका लागि चालु आर्थिक वर्षमा प्रदेश सरकारले साढे ४ करोड रुपैयाँ विनियोजन गरेको जानकारी दिँदै उनले यस वर्ष सञ्चालनमा आउन नसके रकम फ्रिज भएर जाने बताए ।
लम्कीचुहा प्रादेशिक अस्पताल सञ्चालनका लागि आवश्यक परे कानुनसम्मत रूपमा लचकता अपनाउन प्रदेश सरकार तयार रहेको उनले बताए ।
यस क्षेत्रका नागरिकलाई सहज स्वास्थ्य सेवा उपलब्ध गराउने उद्देश्यले आफू निरन्तर प्रयासरत रहेको र सोही अनुरूप कानुनी दायराभित्र रही आवश्यक लचकता अपनाउन पनि तयार रहेको उनको भनाइ थियो।
सेवा कार्यालय स्थापना सँगै लम्कीचुहा नगरपालिका, मोहन्याल गाउँपालिका, जानकी गाउँपालिका, टीकापुर नगरपालिका, जोशीपुर गाउँपालिका त्यसैगरी बर्दगोरिया गाउँपालिका लगायतका क्षेत्रका जनतालाई सहजता हुनेछ ।
कार्यालय व्यवस्थापनका लागि स्थानीय झुप्रे रावतले ५ बर्षका लागि आफ्नाे घर नि:शुल्क उपलब्ध गराएका छन ।
