कैलाली । लम्कीचुहा नगरपालिकाले सुदूरपश्चिम प्रदेशका मुख्यमन्त्री कमलबहादुर शाहले लम्कीचुहा अस्पतालसम्बन्धी दिएको अभिव्यक्तिप्रति गम्भीर आपत्ति जनाएको छ।
यातायात व्यवस्था सेवा कार्यालय, बलियामा आयोजित कार्यक्रममा मुख्यमन्त्रीले दिएको भनिएको अभिव्यक्ति तथ्यहीन, भ्रामक र द्वन्द्व उक्साउने खालको रहेको नगरपालिकाले जनाएको छ।
नगरप्रमुख सुशीला शाहीद्वारा जारी विज्ञप्तिमा लम्कीचुहामा प्रादेशिक अस्पताल स्थापना गर्न नगरपालिका सुरुदेखि नै सकारात्मक र प्रतिबद्ध रहेको उल्लेख गरिएको छ। तर स्थानीय सरकारको अधिकार, कानुनी प्रक्रिया र जनभावनालाई बेवास्ता गर्दै एकपक्षीय ढंगले निर्णय लाद्ने प्रयास अस्वीकार्य हुने स्पष्ट पारिएको छ।
विज्ञप्तिमा सर्वोच्च अदालतमा विचाराधीन विषयमा जिम्मेवार पदमा रहेको व्यक्तिले सार्वजनिक रूपमा भ्रम फैलाउने, तथ्य तोडमोड गर्ने र जनतालाई उक्साउने कार्य संवैधानिक मर्यादा र कानुनी शासनविपरीत भएको उल्लेख छ।
त्यसैगरी, कुनै समझदारीपत्र , कानुनी आधार र संस्थागत प्रक्रिया बिना नै नगरपालिकाको सम्पत्ति, संरचना र जनशक्ति हस्तान्तरण गर्ने तथा आर्थिक भार स्थानीय तहमा थोपर्ने तर नियन्त्रण प्रदेशले राख्ने प्रयास संघीयता र स्थानीय स्वायत्ततामाथिको हस्तक्षेप भएको नगरपालिकाको ठहर छ।
नगरपालिकाले स्पष्ट कार्यढाँचा, कर्मचारी व्यवस्थापन र सम्मानजनक सहमतिसहित प्रदेश सरकारले वार्तामा बोलाए दुई दिनभित्रै समस्या समाधान गरी अस्पताल सञ्चालन गर्न आफूहरू तयार रहेको जनाएको छ। अन्यथा स्थानीय अधिकार मिच्ने, मुद्दालाई राजनीतिकरण गर्ने र बलपूर्वक निर्णय लाद्ने कार्य जारी रहे कानुनी, प्रशासनिक र जनस्तरका सबै वैधानिक विकल्प प्रयोग गर्न बाध्य हुने चेतावनी दिएको छ।
साथै, भ्रमपूर्ण प्रचारका कारण अस्पताल परिसर, कर्मचारी वा सर्वसाधारणमाथि कुनै अप्रिय घटना भए त्यसको नैतिक र राजनीतिक जिम्मेवारी मुख्यमन्त्री र सामाजिक विकास मन्त्रीले लिनुपर्ने पनि विज्ञप्तिमा उल्लेख गरिएको छ।
नगरपालिकाले अन्त्यमा स्थानीय स्वायत्तताको सम्मान गर्दै कानुनी प्रक्रिया र संस्थागत सहमतिबाट अघि बढ्न प्रदेश सरकारसँग आग्रह गरेको छ। साथै आम नागरिकलाई भ्रामक सूचना पछ्याउन नलाग्न अनुरोध गर्दै गुणस्तरीय स्वास्थ्य सेवाप्रतिको आफ्नो प्रतिबद्धता दोहोर्याएको छ।
