धनगढी । कैलालीमा यस वर्ष एक लाख ४५ हजार १७३ मेट्रिकटन गहुँ उत्पादन भएको छ । क्षेत्रफल बढेसँगै गत वर्षको तुलनामा यस वर्ष गहुँ उत्पादनमा वृद्धि भएको कृषि ज्ञान केन्द्र कैलाली जनाएको छ ।
यस वर्ष ३४ हजार ५६५ हेक्टर क्षेत्रफलमा गहुँखेती गरिएकोमा ४ दशमलव २ मेट्रिकटन प्रतिहेक्टर गहुँ उत्पादन भएको कृषि ज्ञान केन्द्र कैलालीका सूचना अधिकारी टेकबहादुर बिष्टले जानकारी दिए ।
गत वर्ष जिल्लामा ३४ हजार ४५० हेक्टर क्षेत्रफलमा गहुँ खेती गरिकामा एक लाख ४४ हजार ६९० मेट्रिकटन गहुँ उत्पादन भएको उनले जानकारी दिए । गत वर्ष पनि गहुँको उत्पादकत्व ४ दशमलव २ मेट्रिकटन प्रतिहेक्टर रहेको उनले बताए ।
उनले भने ‘थोरै क्षेत्रफल बढेकाले उत्पादन बढेको छ । उत्पादकत्वमा कुनै फरक भएको छैन् । खडेरी,बेमौसमी बर्षा लगायतले उत्पादकत्वमा असर पर्ने हो त्यस्तो खासै केही भएको छैन् ।’
उनले कैलाली जिल्ला क्षेत्रफलको हिसाबमा गहुँ खेती गर्नेमा देशमै पहिलो र उत्पादनका हिसाबले चौथोमा पर्ने गरेको बताए ।
उनले भने ‘पछिल्लो समय किसानले उन्नत बीउबिजनको प्रयोग गर्न थालेका छन् । खेतीमा प्रविधिको विकास पनि हुँदै गएको छ । जसले गर्दा उत्पादन पनि बढ्दै गएको छ ।’
ज्ञान केन्द्रले उत्पादन बढाउनका लागि किसानलाई ५० प्रतिशत अनुदानमा मेसिनरी औजार, बीउबिजनलगायत उपलब्ध गराउँदै आएको उनले बताए ।
