कैलाली । वन उपभोक्ता समुहहरु विभिन्न २४ बुँदे माग राख्दै धर्नामा बसेका छन् । साझेदारी वन उपभोक्ता महासंघ, वैज्ञानिक वन व्यवस्थापन उपभोक्ता राष्ट्रिय महासंघ, सामुदायिक वन उपभोक्ता राष्ट्रिय महासंघ नेपाल,वन सम्पदा उपभोक्ता महासंघ नेपाल सहित विभिन्न सामुदायिक वन समन्वय समितिका पदाधिकारीहरु धर्नामा बसेका हुन ।
सुदूरपश्चिम प्रदेशको उधोग पर्यटन वन तथा वातावरण मन्त्रालयको गेटमा यही वैशाख १० गते देखि उनीहरु शान्तिपूर्ण धर्नामा बस्दै आएका हुन् ।
उनीहरु दिगो वन व्यवस्थापन कार्यविधि तयारी र स्वीकृत गरि तत्काल कार्यान्वयन गर्नुपर्ने,वन व्यवस्थापन कार्ययोजना निर्माण र वन व्यवस्थापन योजना अनुसार काठ,दाउरा संकलन तथा व्यवस्थापन गर्न सरकारबाट घुम्ती कोष तथा बैंक ऋणको रुपमा आवश्यक बजेटको व्यवस्थापन गर्न सहयोग गर्नुपर्ने लगायतका २४ बुँदे माग राख्दै धर्नामा बस्दै आएका छन् ।
सामुदयिक वन उपभोक्ता राष्ट्रिय महाससंघ नेपालका केन्द्रिय महासचिव डण्डीराज सुवेदीले वन उपभोक्ताका २४ बुँदे माग कार्यान्वयनका लागि आफूहरु धर्नामा बसेको बताए ।
१६ गतेसम्म शान्तिपूर्ण धर्नामा बस्ने तथा माग पूरा नभए १७ गतेदेखि सुदूरपश्चिमका सवारी साधन वन्द गर्ने उनको भनाई छ । सवारी साधन बन्द पछि पनि मागप्रति प्रदेश सरकार गम्भीर नभए २५ गतेदेखि सुदूरपश्चिमका डिभिजन वन कार्यालय तथा मन्त्रालयमा तालाबन्दी गरिने उनले जानकारी दिए ।
सुदुरपश्चिम प्रदेशका उद्योग, पर्यटन वन तथा वातावरणमन्त्री शिवराज भट्टले सामान्य मागहरुलाई मन्त्रालयले हल गर्ने बताए । उनले भने ‘मन्त्रालयले हल गर्न नसक्ने माग छ भने विधयेक पास गरेर कार्यान्वयनमा जानुपर्ने हुन्छ । त्यसका लागि सभामुख कहाँ लगेर जानु पर्ने हुन्छ ।’
