धनगढी । खाद्य व्यवस्था तथा व्यापार कम्पनी लिमिटेड प्रादेशिक कार्यालय धनगढीले सरकारले निर्धारण गरेको न्यूनतम समर्थन मूल्यभन्दा बढी मूल्यमा गहुँ खरिद गरिरहेको छ । मंगलबारबाट गहुँ खरिद सुरु गरेको खाद्य कम्पनीले जिल्लाको मोहनपुर र टीकापुर गोदामबाट गहुँ खरिद गरिरहेको हो ।
यस वर्ष सरकारले गहुँको न्यूनतम समर्थन मूल्य ३ हजार ९ सय ४५ रुपैयाँ निर्धारण गरेको छ । तर,खाद्य कम्पनीले सरकारले निर्धारण गरेको समर्थन मूल्यभन्दा बढी अर्थात ४ हजार २ सय ५० रुपैयाँमा किसान तथा कृषि सम्बन्धी सहकारीबाट गहुँ खरिद गरिरहेको कार्यालय प्रमुख दीपक थापाले जानकारी दिए ।
कम्पनीले किसानलाई उचित मूल्य दिने तथा किसानलाई प्रोत्साहित गर्ने उदेश्यले सरकारले तोकेको भन्दा बढी मूल्यमा गहुँ खरिद गर्न लागिएको उनले बताए । उनका अनुसार पहिलो दिन मंगलबार मोहनपुर गोदामबाट ५ दशमलव ३८ क्विन्टल गहुँ खरिद भएको छ ।
उनले भने ‘अहिले जिल्लामा २ ठाउँबाट गहुँ खरिद गरिरहेका छौँ । पालिकाहरुले गोदाम उपलब्ध गराएको खण्डमा आवश्यकता अनुसार थप अन्य ठाउँबाट पनि गहुँ खरिद गर्छौँ ।’
यस वर्ष कम्पनीको जिल्लामा गहुँ खरिद कोटा १० हजार क्विन्टल रहेको तथा प्रतिकिसानबाट अधिकतम ७० क्विन्टल र कृषि सम्बन्धी सहकारीबाट प्रतिसहकारी अधिकतम ५ सय क्विन्टलसम्म गहुँ खरिद गरिने उनले बताए ।
टुक्रेको दाना नभएको, परिपक्का, रंग नउडेको, माटो र अन्य वस्तु नमिसिएको सफा तथा कम्पनीको मापदण्ड पूरा भएको गहुँ मात्र खरिद गरिने कम्पनीले जनाएको छ ।
गहुँ बिक्रीका लागि किसानले आफ्नो परिचय खुल्ने कागजात, किसान प्रमाणित भएको वडाको सिफारिस वा प्रमाणित प्रति र स्वघोषणा पत्र अनिवार्य साथमा ल्याउनुपर्ने तथा गहुँको रकम बैंक खाता मार्फत अनलाईन भुक्तानी गरिने कम्पनीले जनाएको छ ।
