धनगढी । यही जेठ ९ गते हुने नवजीवन सहकारी संस्था लिमिटेडको निर्वाचनमा सदस्य पदका उम्मेदवार केशवराज जोशीले सुशासन र सहज सेवा प्रवाह आफ्नो पहिलो प्राथमिकतामा रहेको बताएका छन् ।
उनले भ्रष्टाचार अन्त्य,नातावाद,कृपावादको क्रम भंग गर्ने आफ्नो चुनावी एजेण्डा रहेको बताए ।
निशाना न्युजसँगको कुराकानीमा उनले भने ‘संस्थामा पारदर्शीता,आर्थिक प्रशासनिक,नाफा,घाटा लगानी, बचत लगायतका कुरा हुन्छन् । मैले जितेमा यस्ता सूचना तथा संस्थागत जानकारी मासिकरुपमा सार्वजनिक गर्नमा मेरो प्रयास रहनेछ ।’
त्यस्तै, उनले शेयर सदस्यको सुविधा र हकहितका लागि लड्ने प्रतिवद्धता जनाउँदै कर्मचारीको वृति विकासका लागि शिक्षा,तालिम,भ्रमण,बजार बृद्धि अनुसारको तलव भत्ताको सुविधा,स्वास्थ्य सुरक्षाका लागि विशेष पहल गर्ने योजना रहेको बताए ।
उनले आर्थिकरुपमा विपन्न शेयर सदस्यका बालबालिकालाई सुलभ तथा निःशुल्क आधारभूत तथा प्राविधिक शिक्षालय स्थापना गर्ने योजना रहेको बताए ।
जोशीले पछिल्लो समय सहकारीप्रति नागरिकको अविश्वास बढ्दै गएको बताउँदै त्यसलाई हटाउन पूर्णरुपमा पहल गर्ने प्रतिवद्धता व्यक्त गरेका छन् । आफू विगत लामो समयदेखि निसर्ग अस्पतालमा रहेको बताउँदै उनले अस्पताल र नवजीवन सहकारीबीच सहकार्य गरेर आमजनतालाई सकेसम्मको स्वास्थ्य सेवा दिन प्रयास गर्ने बताए ।
दुबै संस्थाबीचको सहकार्यमा स्वास्थ्य सेवामा विशेष छुटको व्यवस्था गर्न पहल गर्ने उनको भनाइ छ । उनले चुनावी माहोल तातिँदै गएका बेला आफ्नो जनमत बलियो हुँदै गएको दाबी गरे ।
