धनगढी । कैलालीमा सञ्चालनमा रहेको राष्ट्रिय कृषि आधुनिकीकरण कार्यक्रममा अन्तरगत सञ्चालित विभिन्न कृषि जोनमा उत्पादकत्व बढ्दै गएको छ ।
जिल्लामा सञ्चालित गहुँ सुपरजोन,तेलहन जोन,धान जोन र माछा जोनमा उत्पादकत्व बढ्दै गएको हो ।
कार्यक्रम सञ्चालन हुँदाका बखत गहुँको उत्पादकत्व २.९, तोरीको उत्पादकत्व ०.९, धानको उत्पादकत्व ३.४७ मेट्रिक टन प्रतिहेक्टर रहेकामा हाल गहुँको उत्पादकत्व ४.६, तोरीको उत्पादकत्व १.२३ र ५.३१ मेट्रिक टन प्रतिहेक्टर पुगेको राष्ट्रिय कृषि आधुनिकीकरण कार्यक्रम, कार्यान्वयन एकाइ कैलालीका सूचना अधिकारी भीष्मराज रेग्मीले जानकारी दिए ।
त्यस्तै, माछा जोन अन्तरगत कार्प जातका माछाको उत्पादकत्व ४.७ मेट्रिक टन प्रतिहेक्टर र पङ्गासियर्सको ३६.२ मेट्रिक टन प्रतिहेक्टर रहेको उनले जानकारी दिए ।
जिल्लामा गहुँ सुपरजोन आव २०७३/७४, तेलहन जोन आव २०७४/७५, धान जोन आव २०७८/७९ र माछा जोन आव २०८१/८२ मा सुरु भएको उनले जानकारी दिए ।
गहुँ सुपरजोन ७ हजार २ सय हेक्टर, तेलहन जोन १ हजार ५ सय हेक्टर, धान जोन १ हजार ५ सय हेक्टर र माछा जोन ५सय ५ हेक्टर क्षेत्रफलमा सञ्चालित रहेको उनको भनाइ छ ।
‘गहुँ सुपरजोन’ जिल्लाको कैलारी गाउँपालिका, गौरीगङ्गा र घोडाघोडी नगरपालिकाका विभिन्न १८ वडामा, ‘तेलहन जोन’ जानकी, जोशीपुर गाउँपालिका, भजनी, घोडाघोडी नगरपालिका र बर्दगोरिया गाउँपालिकाका विभिन्न २९ वडा र ‘धान जोन’ जोशीपुर गाउँपालिका, भजनी नगरपालिका र जानकी गाउँपालिकाका विभिन्न ९ वटा वडामा सञ्चालनमा रहेको उनले जानकारी दिए ।
माछा जोन कार्यक्रम धनगढी उपमहानगरपालिका, कैलारी गाउँपालिका, घोडाघोडी नगरपालिका र भजनी नगरपालिकाका विभिन्न क्षेत्रमा सञ्चालनमा रहेको उनले जानकारी दिए ।
लागत घटाएर कृषि आधुनिकीकरण गर्दै उत्पादकत्व बढाउन ५० प्रतिशत अनुदानमा बीउ, विषादी, कृषियन्त्र उपकरण वितरण गर्ने गरिएको उनको भनाइ छ ।
