धनगढी । धनगढी उपमहानगरपालिका-१६ स्थित भादामा यही जेठ १९ गतेदेखि दोस्रो सुदूरपश्चिम प्रदेशस्तरीय होमस्टे मेला महोत्सव २०८३ आयोजना हुने भएको छ।
थारु होमस्टे गाउँ भादा पर्यटन विकास तथा व्यवस्थापन समितिको आयोजनामा हुने महोत्सवलाई सुदूरपश्चिम प्रदेश सरकारको उद्योग, पर्यटन, वन तथा वातावरण मन्त्रालयले प्रवर्द्धन गरेको छ।
महोत्सवबारे जानकारी दिन आज धनगढीमा आयोजित पत्रकार सम्मेलनमा बोल्दै भादा होमस्टेका अध्यक्ष लक्ष्मीनारायण चौधरीले सुदूरपश्चिमको मौलिक संस्कृति, परम्परा, खानपान र ग्रामीण पर्यटनलाई राष्ट्रिय तथा अन्तर्राष्ट्रिय स्तरमा चिनाउने उद्देश्यसहित महोत्सवको आयोजना गर्न लागिएको बताए ।
“प्रकृति, संस्कृति र पर्यटन नेपालको पहिचान, समृद्ध मुलुक निर्माण होमस्टेको अभियान” भन्ने मूल नारासहित आयोजना हुने महोत्सव तीन दिनसम्म सञ्चालन हुने जनाइएको छ।
भादा स्थित दीपेन्द्र चारपाते माध्यमिक विद्यालयको खेल मैदानमा हुने महोत्सव जेठ २१ गतेसम्म चल्ने आयोजकले जनाएको छ।
महोत्सवमा सुदूरपश्चिमका हिमाल, पहाड र तराईका विभिन्न जातजाति तथा समुदायको मौलिक संस्कृति, रहनसहन, भेषभूषा र खानपान प्रस्तुत गरिनेछ। पछिल्लो समय लोप हुँदै गइरहेका परम्परा र संस्कृतिको संरक्षणसँगै होमस्टे पर्यटनलाई थप प्रवर्द्धन गर्ने लक्ष्य आयोजकको रहेको छ।
हरेक दिन विभिन्न समुदायका सांस्कृतिक नृत्य तथा गीत प्रस्तुत गरिनेछन् भने स्थानीयदेखि राष्ट्रिय कलाकारसम्मको सांगीतिक प्रस्तुति रहनेछ। आगन्तुकले सुदूरपश्चिमका परम्परागत परिकारको स्वाद लिन पाइने अध्यक्ष चौधरीले बताए ।
त्यसैगरी थारु हस्तकलाको प्रत्यक्ष अवलोकन, काठे पिङ, शुक्लाफाँटा राष्ट्रिय निकुञ्ज को जंगल सफारी लगायत गतिविधिले महोत्सवलाई थप आकर्षक बनाउने आयोजकको विश्वास छ।
महोत्सवमा स्लो साइकल रेस, धैंटोफोर, भलाद्मी दौड तथा पेनाल्टी सुटआउटजस्ता खेलकुद गतिविधि पनि समावेश गरिएका छन् । आयोजकका अनुसार करिब एक लाख २५ हजार दर्शक तथा पर्यटक सहभागी हुने अपेक्षा गरिएको छ।
