धनगढी । स्थानीय तहमा सीमान्तकृत महिलाको सहभागिता बढाउनु पर्नेमा जोड दिइएको छ ।
बुधबार संकल्प,शान्ति,न्याय र लोकतन्त्रका लागि महिला सञ्जाल सुदूरपश्चिमले धनगढीमा आयोजना गरेको आगामी स्थानीय तहको निर्वाचनमा सीमान्तकृत महिलाको सहभागिता बढाउनका लागि मिडियाको भूमिका सम्बन्धी अन्तरक्रिया कार्यक्रमका सहभागीले स्थानीय तहमा सीमान्तकृत महिलाको सहभागिता बढाउनु पर्नेमा जोड दिएका हुन् ।
कार्यक्रमका सहभागीहरुले महिलालाई सक्षम बनाइ सहभागिता बढाउन मिडियाले संवैधानिक व्यवस्था, तथा नेतृत्वमा महिलाको महत्वबारे जनतालाई जानकारी दिने, लैङ्गिक विभेद विरुद्ध आवाज उठाउने, समान अवसर सुनिश्चित गर्न दबाब सिर्जना गर्ने,महिला केन्द्रित कार्यक्रम सञ्चालन गर्नेलगायतका कुरामा जोड दिनुपर्ने बताएका छन् ।
कार्यक्रममा कान्तिपुरकर्मी अर्जुन शाहले स्थानीय तहमा महिलाको हालको अवस्था,चुनौति तथा स्थानीय तहमा महिला सहभागिता बढाउन मिडियाको भूमिकालगायत बिषयमा सहजीकरण गरेका थिए ।
उनले २०७९ को स्थानीय तहको निर्वाचनमा सुदूरपश्चिममा महिला,दलितको प्रतिनिधित्वको तथ्यांक प्रस्तुत गरेका थिए ।
उनले २०७९ को निर्वाचनमा ७३४ वडा रहेको सुदूरपश्चिममा महिला वडाध्यक्ष ५ जना र दलित वडाध्यक्ष १४ जनामात्रै रहेको तथ्यांक प्रस्तुत गरे ।
उनले स्थानीय तहको निर्वाचनमा महिला सहभागिता बढाउन अति आवश्यक रहेको बताउँदै त्यसमा मिडियाको भूमिका पनि महत्वपूर्ण रहने बताए ।
कार्यक्रममा बोल्दै संकल्प,शान्ति,न्याय र लोकतन्त्रका लागि महिला सञ्जाल सुदूरपश्चिम प्रदेश अध्यक्ष अम्बिका ताम्राकारले जस्को सवालको उ नै नेतृत्व तहमा पुग्नु पर्ने बताइन् ।
उनले स्थानीय तहमा सीमान्तकृत महिला,दलित,जनजाति,यौनिक अल्पसंख्यक महिलाको अर्थपूर्ण सहभागिता हुनुपर्ने बताइन् । उनले स्थानीय तहमा सीमान्तकृत महिलाको सहभागिता बढाउन मिडियाको भूमिका महत्वपूर्ण रहने बताइन् ।
कार्यक्रमको सहजीकरण संस्थाका सचिव तारा चौधरीले गरेकी थिइन् भने विभिन्न सञ्चारमाध्यममा आवद्ध सञ्चारकर्मीको सहमागिता रहेको थियो ।
