धनगढी । सुदूरपश्चिम प्रदेका भूमि व्यवस्था,कृषि तथा सहकारीमन्त्री वीरबहादुर थापाले मुक्त हलियाको पुनःस्थापनाको काम छिटो सकियोस् भन्ने चाहाना रहेको बताएका छन् ।

बिहीबार राष्ट्रिय मुक्त हलिया समाज महासंघ नेपालको धनगढीमा आयोजित १४ औं वार्षिक साधारणसभा तथा सातौं राष्ट्रिय महाधिवेशनको उद्घाटन समारोहमा बोल्दै उनले यस्तो बताएका हुन् ।

उनले भने ‘मनत्रालयसँग बजेट कम छ । स्थानीय पालिका तथा दातृ निकायले साझेदारीमा काम गर्न चाहे मन्त्रालयले मुक्त हलियाका आवस निर्माणमा सहयोग गर्नेछ । त्यसमा हामी तयार छौँ ।’

उनले संघ सरकारले पुनःस्थापनाको काम स्थानीय सरकारलाई हस्तान्तरण गरेको र प्रदेश सरकारले बनाएको कार्यविधिमा पनि स्थानीय सरकारलाई जिम्मेवारी दिएको बताउँदै यसमा स्थानीय सरकार बढी जिम्मेवार हुनुपर्ने बताए ।

उनले छुट मुक्त हलियाको तथ्यांक संकलन,परिचय पत्र वितरण स्थानीय सरकारको भएको बताउँदै यसमा स्थानीय सरकार लाग्नुपर्ने बताए ।
त्यस्तै,प्रदेश सरकार मुक्त हलियाको आयआर्जनका लागि विभिन्न कृषि कार्यक्रम सञ्चालन गर्दै आएको र त्यसमा मुक्त हलियाको निवेदन नै नपर्ने समस्या रहेको बताए ।

उनले मुक्त हलियाका अगुवा नेतृत्वले कृषि कार्यक्रममा जोड्न पहल गर्नुपर्ने बताए । कार्यक्रमा बोल्दै संविधानसभा सदस्य हरि श्रीमाइलीले राष्ट्रिय मुक्त हलिया समाज महासंघ मुक्त हलियालाई न्याय,मानवअधिकार,न्यायोचित पुनःस्थापनालगायतका काम गर्न स्थापित संस्था भएको बताए ।

उनले संस्थाले हलिया आन्दोलन तथा हलियाका सवालमा थुप्रै काम गरेको बताए । उनले तीनै तहका सरकारको व्यवास्ताका कारण अझै पनि सबै मुक्त हलियाको पुनःस्थापना हुन नसकेको बताउँदै यसमा सबै तहका सरकार जिम्मेवार बन्नुपर्ने बताए ।
महासंघका केन्द्रीय अध्यक्ष ईश्वर सुनारको अध्यक्षतामा भएको उद्घाटन सत्रको सञ्चालन महासंघका कार्यकारी निर्देशक हरिसिंह बोहराले गरेका थिए ।

कार्यक्रमा सुदूरपश्चिम तथा कर्णाली प्रदेशका महासंघका प्रतिनिधि,विभिन्न संघ संस्थाका प्रतिनिधिहरुको उपस्थिति रहेको थियो ।