धनगढी । देशका विभिन्न क्षेत्रमा बाढी, पहिरो तथा प्राकृतिक विपत्तिबाट प्रभावित नागरिकको उद्धार, राहत र पुनःस्थापनालाई प्रभावकारी बनाउन धनगढी उपमहानगरपालिकाका निवर्तमान नगरप्रमुख नृपबहादुर वडले सरकारसँग आग्रह गरेका छन्।
विपत्तिको समयमा पीडित नागरिकको दुःखलाई कुनै दल, जात, क्षेत्र, वर्ग वा राजनीतिक आस्थासँग जोडेर हेर्न नहुने भन्दै वडले राहत वितरणमा निष्पक्षता, पारदर्शिता र मानवीय सम्मान कायम गर्न सरकार तथा सम्बन्धित निकायको ध्यानाकर्षण गराएका छन्।
वास्तविक पीडितको पहिचान गरी क्षति र आवश्यकताका आधारमा राहत उपलब्ध गराउनुपर्ने उनको भनाइ छ।
राजनीतिक पहुँच, व्यक्तिगत सम्बन्ध वा अन्य कुनै आधारमा राहत वितरणमा विभेद गर्न नहुने उनले बताएका छन्।
“विपत्तिको समयमा पीडित नागरिकको सबैभन्दा ठूलो आवश्यकता सहयोग र भरोसा हो। यस्तो अवस्थामा राजनीतिक आस्था वा व्यक्तिगत सम्बन्धका आधारमा कसैलाई विभेद गर्नु हुँदैन,” वडले भनेका छन्।
वडले घरबार गुमाएका, विस्थापित भएका तथा आयआर्जनको स्रोत गुमाएका परिवारलाई विशेष प्राथमिकता दिन आग्रह गरेका छन्।
तत्काल खाद्यान्न, खानेपानी, स्वास्थ्य सेवा, कपडा र सुरक्षित बसोबासको व्यवस्था गर्नुका साथै प्रभावित परिवारको दीर्घकालीन पुनःस्थापनाका लागि ठोस योजना अघि बढाउनुपर्ने उनको सुझाव छ।
राहत तथा पुनःस्थापनाका कार्यक्रम प्रभावकारी बनाउन स्थानीय तह, प्रदेश र संघीय सरकारबीच समन्वय आवश्यक रहेको उनले बताएका छन्।
साथै राहत संकलन र वितरणमा पारदर्शिता कायम गर्दै प्राप्त सहयोग कहाँ र कसरी प्रयोग भइरहेको छ भन्ने विवरण सार्वजनिक गर्न सम्बन्धित निकायलाई आग्रह गरेका छन्।
विपत्तिको समयमा राजनीतिक प्रतिस्पर्धा र आरोप–प्रत्यारोपभन्दा माथि उठेर मानवीय सेवामा सबै पक्ष एकजुट हुनुपर्ने वडको भनाइ छ।
उनले सामाजिक संघसंस्था, व्यवसायी, युवा तथा नागरिक समाजलाई समेत आफ्नो क्षमताअनुसार बाढीपीडितको सहयोगमा जुट्न आह्वान गरेका छन्।
“विपत्तिमा परेको नागरिकको साथमा राज्य उभिन सके मात्र नागरिकले राज्यप्रति भरोसा गर्न सक्छन्। त्यसैले राहत वितरणमा पक्षपात होइन, मानवीयता, आवश्यकता र न्यायलाई आधार बनाऔँ,” वडले सरकारसँग आग्रह गरेका छन्।
