धनगढी- नेपाली कांग्रेसका सभापति एवं प्रधानमन्त्री शेरबहादुर देउवाले पश्चिम सेती जलविद्युत परियोजना निर्माणका लागि सम्झौता भइसकेको बताएका छन् । प्रधानमन्त्री देउवाले सुदूरपश्चिम प्रदेशको आर्थिक समुन्नतिका लागि यो परियोजना छिट्टै सञ्चालनमा ल्याइने पनि बताए ।
आज शुक्रबार गृह जिल्ला डडेल्धुराको गन्यापधुरा तथा बेलापुरमा आयोजित चुनावी सभामा उनले पश्चिम सेती परियोजनाबाट ठूलो परिमाणमा रोजगारी सिर्जना हुने विश्वास व्यक्त गरे ।
प्रधानमन्त्री देउवाले भारतद्वारा अतिक्रमित कालापानी, लिम्पियाधुरा र लिपुलेक फिर्ता गर्न कूटनीतिक पहल भइरहेको बताए । उनले भारत र चीनसँगको सीमा विवादलाई सरकारले कूटनीतिक वार्ताबाटै समाधान गरिने बताए ।
त्यस्तै, प्रधानमन्त्री देउवाले डडेल्धुरामा मेडिकल कलेज छिट्टै सञ्चालनमा आउने पनि बताए । बेलापुरको चुनावी सभामा उनले सुदूरपश्चिम प्रदेशका ७ पहाडी जिल्लालाई लक्षित गरेर डडेल्धुरामा मेडिकल कलेज सञ्चालन प्रक्रिया अघि बढेको बताए ।
उनले धनगढीदेखि डडेल्धुरासम्म ४ लेन सडक निर्माणको योजनासमेत अघि बढाइएको बताए ।
