धनगढी– नेपाली कांग्रेसका केन्द्रीय सदस्य एवम् पार्टी प्रवक्ता डा. प्रकाशशरण महतले नेपाली कांग्रेस उम्मेदवारी कम भन्दा पनि परिणाम बढी ल्याउने कुरामा केन्द्रित भएको बताएका छन् । शनिबार कैलालीमा आयोजित पत्रकार सम्मेलनमा बोल्दै उनले चुनावमा कांग्रेसले राम्रो परिणाम ल्याउनुपर्ने बताए ।
‘गठबन्धनका कारण धेरै आकांक्षीले टिकट पाउन सकेनन्, सबै ठाउँमा कांग्रेसका उम्मेदवार छैनन्,’ उनले भने, ‘अब भएका उम्मेदवारहरुलाई जिताएर कसरी परिणाम बढी ल्याउने भन्नेमा लाग्नुपर्छ ।’ उनले सबै नेता कार्यकर्तालाई आफ्नो उम्मेदवारका पक्षमा लागेर जिताउन आग्रह गरे ।
उनले बहुमत गठबन्धनकै पक्षमा आउने र गठबन्धले नै सरकार बनाउने दाबीसमेत गरे । उनले निर्वाचन परिणापछि सरकारको नेतृत्व कसले गर्ने भन्ने विषयमा भने कुनै औपचारिक निर्णय नभएको बताए । ‘गठबन्धनको पक्षमा बहुमत आउँदा कांग्रेसनै ठूलो दल बन्ने हो,’ उनले भने, ‘ठूलो दलले नै सरकारको नेतृत्वको लागि दाबी गर्नु स्वभाविक हुन्छ ।’
यस्तै उनले सरकारले आफ्नो पालामा गरिएका कामको पनि प्रचार–प्रसार गरिनुपर्ने बताए । ‘हामी गरेको कामको विज्ञापन गर्न जान्दैनौं, काम गरेर पनि भन्दैनौं,’ उनले भने, ‘थरेको कामको विज्ञापन गर्नुपनि पर्छ । नभए जनतालाई जानकारी नहुनसक्छ ।’ उनले एमाले अध्यक्ष ओलीले नगरेका कामको पनि आफूहरुले गर्यौं भन्दै प्रचार गर्ने गरेको आरोपसमेत लगाए ।
