धनगढी– सुदूरपश्चिम महोत्सवको १६ औँ संस्करण आगामी मंसिर २२ गतेदेखि हुने भएको छ । कैलाली उद्योग वाणिज्य संघले सोमबार धनगढीमा पत्रकार सम्मेलनको आयोजना गर्दै महोत्सव आयोजनाबारे जानकारी दिएको हो । महोत्सव यही मंसिर २२ गतेदेखि पुस २ गतेसम्म धनगढी उपमहागनरपालिका वडा नम्बर १ पशुपति टोलमा सञ्चालन हुने संघका अध्यक्ष पुष्पराज कुँवरले जानकारी दिए । लागत अनुमान दुई करोड हुने महोत्सवमा १० करोड बराबरको कारोबार हुने आँकलन गरिएको उनले बताए ।

उनका अनुसार महोत्सवमा कृषि, जडिवुटी, हस्तकला, फर्निचर, अटोमोवाइल्स, गारमेन्ट, इलेक्टोनिकल, होटल र सूचना प्रविधि गरि ५०० जति संख्याको स्टलहरु रहने छन् । स्थानीय उत्पादन र महिला उद्यमीलाई प्रोत्साहन गरिने महोत्सवलाई करिब पाँच लाख व्यक्तिले अवलोकन गर्ने अनुमान गरिएको छ ।

महोत्सवलाई भव्यरुपमा सम्पन्न गर्न मूल समिति सहित २६ उप–समिति गठन गरिएको अध्यक्ष कुँवरले बताए ।महोत्सवबाटै सुदूरपश्चिमको आर्थिक विकासको लागि सम्भावनाहरुको खोजी गर्दै यस क्षेत्रको पर्यटन विकास, साँस्कृति कला, खानपान, भाषाको संरक्षण गर्दै व्यवसायिक सफलता प्राप्त गरि जनताको गुणस्तरीय जीवनमा महोत्सवले सहयोग पुग्ने उनको भनाइ छ ।

यस वर्षको महोत्सवमा रमाइलो मेलामा केही फरक देख्न सकिने संघका बरिष्ठ उपाध्यक्ष पुष्कर ओझाले बताए । उनले वृहत व्यवसायी कृषि प्रदर्शनी तथा प्रतियोगिता ताजा तरकारी र कृषिमा आएको प्रविधिसंगै माछा केरा, पोट्री, दुधजन्य पदार्थ, च्याउ आदि व्यवसायलाई प्रदर्शनीमा विशेष जोड दिइने बताए ।